DILI, 08 Jullu 2025 (TATOLI)—Prezidente Repúblika liuhusi Xefe Kasa Sivíl konvida Ministru Turizmu no Ambiente (MTA) ho Ministériu Juventude Desportu Arte no Kultura (MJDAK) inklui Prezidente Siklízmu no Prezidente Federasaun Atletizmu hodi deskute kona-ba atividade desportu Dili Internasionál Maratona no festivál kultura Rabilau.
Notísia Relevante: Atleta Teófilo agradese PR Horta ne’ebé realiza eventu Dili Internasionál Maratona
“Ohin, ami mai deskute hamutuk ona desizaun balun no iha tempu badak sei hala’o nafatin hanesan Dili internasionál maratona nian ne’ebé define ho tema foun “Run for Palestina,” katak halai ho solidariedade ema-nian,” Vise Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, informa ba jornalista sira hafoin termina enkontru iha Palásiu Prezidensiál Nicolau Lobato, Bairru Pite, ohin.
Nia hatutan, atividade daruak nian mak iha tinan ida-ne’e Governu sei realiza nafatin festivál kultura Rabilau ne’ebé sei hala’o durante kalan tolu no atividade lubuk ida mak sei realiza tan iha tinan 2026, maibé sei hela faze diskusaun.
Ministru Juventude, Desportu, Arte no Kultura (MJDAK), Nelyo Isaac Sarmento, hateten iha fulan Outobru 2025 sei realiza kompetisaun Dili Internasionál Maratona ne’ebé ninia merkadu ba partisipasaun ne’e husi nasaun Ázia ninian, oportunidade mós ba atleta nasionál sira inklui ho ema estranjeiru sira ne’ebé hela iha Dili.
“Ekipa komisaun ne’e sei kompostu husi parte Palásiu Prezidente no MJDAK inklui Federasaun Atletizmu sei elabora kritéria sira hotu hafoin anúnsia ofisiál iha tempu besik. Nune’e, ema hahú halo rejistrasaun hodi partisipa másimu liután iha Dili Internasionál Maratona,” nia dehan.
Prezidente Federasaun Atletizmu, Afranio Xavier Amaral, hateten atividade despostu Dili Internasionál Maratona ida-ne’e aumenta tan liafuan balun ba tema ne’ebé define ona husi xefe Estadu rasik, entaun ida-ne’e previléjiu uitoana, nune’e parte Federasaun Atletizmu sei prepara husi parte tékniku atu eventu ne’e bele la’o ho di’ak.
“Espera partisipante sira bele partisipa ho másimu liuliu Ázia ninian no atleta nasionál inklui sosiedade sira, tanba ita mak sai uma-na’in. Ha’u garante apoiu husi parte Governu nian bele reforsa tékniku sira bele la’o ho susesu,” nia hateten.
Notísia Relevante: PR Horta hakarak Festivál Rabilau sai eventu boot iha Timor-Leste
Jornalista : Alexandra da Costa
Editór : Cancio Ximenes
