DILI, 01 Agustu 2025 (TATOLI)—Ekipa Selesaun Nasionál Futeból Feminina Timor-Leste kategoria seniór no U-20 sei partisipa kompetisaun rua hanesan Asian Football Federation (AFF) Women’s Championship no Asian Football Confederation (AFC) U-20 Women’s Asian Cup 2026.
Jogadór hirak-ne’e, aprezenta aan no sei aranka bá nasaun rua hanesan Vietnam ne’ebé sei kompete husi ekipa seniór Selesaun Nasionál Feminina ba kompetisaun AFF Women’s Championship no Selesaun Feminina U-20 ba Laos hodi tuir jogu AFC U-20 Women’s Asian Cup tinan-2026.
Adjuntu Sekretáriu Jerál Federasaun Futeból Timor-Leste (FFTL), Fernando Xavier hateten labele sente ida-ne’e hanesan orgullu maibé hanesan misaun ba jogadór sira-ne’ebé mak asumi ho responsabilidade, tanba reprezenta nasaun no bandeira nasionál.
Notísia relevante: Jessica Faculto hakarak reforsa ekipa Selesaun Nasionál Feminina
Fernando konsidera jogadór sira liuhosi FFTL nu’udár embaixadór Estadu iha rai-li’ur nune’e presiza disiplina hodi hatudu prestaun tanba sei dignifika bandeira no hamorin naran Timor-Leste iha mundu futeból.
Alende ne’e, nia mós husu ba jogadór sira atu kontinua rona no tau konfiansa ba ekipa treinadór sira durante partisipa kompetisaun rua ne’ebé selesaun nasionál hala’o iha fulan-Agustu ne’e.
“Ita fiar katak selesaun rua ne’e sei hatudu prestasaun di’ak liután kompara ho selesaun anteriór,” Adjuntu Sekretáriu Jerál Federasaun Futeból Timor-Leste (FFTL), Fernando Xavier hateten liuhosi serimónia despedida iha Bairros dos Grilos, Sesta ne’e.
Tuir planu, ekipa Selesaun Nasionál U-20 sei dezkola uluk iha loron-Domingu, 03 Agustu, iha-ne’ebé Timor-Leste sei hahú jogu kontra Koreia Súl iha loron-06 Agustu, Bangladés iha loron-08 Agostu no hasoru uma-na’in Laos iha loron-10 Agustu.
Enkuantu, ekipa Feminina Seniór sei aranka ba Vietnam iha loron-05 Agustu no sei koloka iha grupu B hamutuk ho nasaun tolu seluk hanesan Austrália, Myanmar no Filipina, iha ne’ebé sei hahú jogu dahuluk kontra Filipina iha loron-07 Agustu.
Jornalista: Natalino Belo
Editór: Xisto Freitas da Piedade
