VIKEKE, 01 Agustu 2025 (TATOLI)—Suku Bibileo no Matahoi iha Vikeke konklui ona implementasaun projetu Programa Nasionál Dezenvolvimentu Suku (PNDS) ba tinan 2025 nian.
“Projetu PNDS ba munisípiu Vikeke ba tinan 2025 ita iha obra 40 ne’ebé implementa ona, iha suku Matahoi, postu Uatulari konstrui estrada sirtu beton metru 500 , ho serbisu fíziku konklui ona, inklui suku Bibileo, postu Vikeke Vila hanesan konstrusaun estrada sirtu membru 300 konklui ona, agora ita hein relatóriu 100% nian,” Diretór Servisu PNDS munisípiu Vikeke, Fransisco Soares Varela, hato’o ba Ajénsia TATOLI, iha ninia knaar fatin, Administrasaun munisípiu Vikeke, ohin.
Husi obra PNDS ne’ebé implementa ona iha suku 36, iha suku rua konklui ona, enkuantu suku balun atinje 25%, 80% no suku Ahik seidauk implementa tanba kestaun estrada ne’ebé difikulta distribuisaun materiál.
“Iha implementasaun ne’e dezafiu ida mak klíma (udan), problema ida mak hasoru servisu Eletrisidade de Timor-Leste, Empreza Públika (EDTL, E.P) hanesan iha suku Uagia ita halo kontrusaun edifísiu eskola kona fiu eletrisidade no suku Karaubalu ita kontrui poste eletrisidade, maibé ami halo ona koordenasaun ho EDTL munisípiu Vikeke atu muda poste no fiu eletrisidade,” nia nia akresenta.
Notísia relevante : PNDS Vikeke sei implementa projetu 40 iha suku 36
Obra PNDS ne’ebé daudaun ne’e implementa iha tinan 2025 tenke finaliza iha tinan ne’e, maibé bainhira liu ida-ne’e mak obra seidauk konklui maka automátikamentu orsamentu sei fila ba kofre Estadu.
“Atu obra sira-ne’e finaliza sedu ka tarde depende ba jestaun suku ida-idak nian, maibé kuandu to’o dezembru la finaliza orsamentu sei fila ba kofre Estadu. Tanba ne’e, Autoridade suku sira mak tenke aselera serbisu molok tama findu iha Dezenbru ita tenke konklui. Implementasaun obra sira-ne’e ami-nia ekipa ne’ebé destaka iha kada postu kontinua akompaña obra sira-ne’e hodi grante ba kualidade no fó benefísiu ba povu sira iha suku,” nia hato’o.
Obra PNDS hamutuk 40 ne’ebé implementa iha suku 36 iha tinan 2025, ho kustu $1.491.925,7.
Jornalista: Vitorino Lopez da Costa
Editór: Xisto Freitas da Piedade
