DILI, 02 Agostu 2025 (TATOLI)—Prevedór Direitu Humanu no Justisa (PFHJ), Virgílio da Silva Guterres, sente triste ho informasaun ne’ebé espalla kona-ba autór judisiál ida deskonfia komete asédiu seksúal.
Notísia Relevante: JU,S husu KSMP suspende suspeitu ba kazu asediu seksuál
“Laran triste haree no rona ida-ne’e liuliu envolve entidade ida-ne’ebé públiku dala barak kazu barak tau fiar ba setór justisa nian. Sente triste tebes, hein katak vítima parte ne’ebé prejudikadu iha liberdade naton iha asesu naton, atu buka oinsá atu hetan justisa ba ba asuntu ida-ne’e,” Virgilio Guterres hateten ba Agência Tatoli iha Kaikoli, sesta ne’e.
Nia hatutan, iha koñesementu kona-ba ida-ne’e tanba kolega husi vitima nian ba informa kona-ba situasaun ne’e.
“Buat ne’ebé ita akompaña ne’ e mak iha tendénsia atu halo alin feto ne’ebé hatoo keixa atu sai fali vitima iha mídia sosiál,” nia dehan.
Tanba ne’e, nia husu atu públiku buka hatene informasaun loloos ba kazu ida-ne’e.
“Maibé informasaun atu loloos halo nusa ita hotu tenke to’o konkordánsia ida katak, la tolera ofisiál públiku sira uza fasilidade públiku hodi halo violasaun ka halo buat ne’ebé tuir sira-nia hakarak,” nia dehan.
Nia dehan, labele uza karreta públiku no fasilidade públiku ba ita-nia interrese pesoál maibé sé mak loos no sala ne’e só tribunal mak deside.
“Sé mak loos no sé mak sala Tribunál mak deside, importante mak kontinua konsidera prejunsaun inusénsia. Maibe, ba kestaun ida-ne’e sente triste, tanba envolve ita-nia ema sira-ne’ebé ita fiar. Iha setór justisa nian no iha ne’e hatudu no halo foer setór justisa nia imajen,” nia hateten.
Nia husu ba autór judisiáriu sira ne’e husu deskulpa ba públiku atu restaura hikas imajen setor justisa nian ba públiku.
“Hein katak maluk sira iha setór justisa sei buka meiu atu restaura imajen setór justisa nian ba púbiku, atu nunee ema ida-rua nia sala la hamonu ita-nia setór justisa nia integridade, se autór judisiáriu husu deskulpa ba públiku,” nia dehan.
Jornalista : Natalino Costa
Editór : Cancio Ximenes
