MANATUTU, 03 Agostu 2025 (TATOLI)—Autoridade lokál sira husi nivél munisipál to’o administrativu husu Governu liuhusi Ministériu Saúde atu aumenta pesoál saúde sira iha postu administrativu no suku sira, nune’e bele redús númeru mortalidade no halo atendementu emerjénsia ho lalais.
Administradór postu-administrativu Natarbora, José Ramos, hateten Governu konstrui uma ba pesoál saúde sira iha sentru saúde laran hodi halo atendementu emerjénsia ba pasiente sira, maibé tanba doutora ne’e ho kondisaun isin-rua, nia tenke hela iha ninia uma rasik tanba ne’e mak difikulta atendementu emerjénsia ho lalais ho di’ak.
“Maibé la signifika sira abandona fatin ida-ne’e. Aleinde ne’e mós, sira halo rotasaun ba servisu (shift) katak bainhira doutór ida iha ninia tarefa, nia sei halo servisu no hela iha uma dinas ne’e rasik,” autoridade lokál ne’e hateten ba jornalista sira iha Umaboku, Natarbora, sábadu (02 Agostu 2025).
Aleinde ne’e, autoridade ne’e hatutan, dalaruma mós sira halo atendementu tarde tanba pesoál saúde sira-ne’e balun hela fali iha Fatuberliu, entaun difikulta sira atu halo ateneimentu emerjénsia ho lalais.
“Satán pesoál saúde iha ne’e uitoan de’it labele halo servisu ho másimu ba pasiente sira”, nia informa.
Prezidente autoridade munisípiu Manatutu, Luís Fernandes, informa maske nia seidauk rona informasaun kona-ba ne’e, maibé nia garante katak ne’e tamba rekursu umanu ne’ebé limatadu hodi difikulta ba atendementu pasiente sira bainhira ba halo tratamentu iha sentru saúde.
“Dalaruma pesoál saúde sira husi munisípiu mak ajuda apoiu halo atendementu ba pasiente sira iha postu to’o suku inklui aldeia sira,” nia hateten.
Maibé, nia dehan, durante ne’e sira-nia pesoál saúde sira sempre halo servisu movel hodi tama-sai suku no aldeia, hodi halo tratamentu ba komunidade ne’ebé laiha kbi’it ka forsa hodi hakat ba sentru saúde sira-ne’ebé estabelese iha postu administrative.
Aleinde ne’e, dalaruma ho distánsia ne’ebé mak dook bele halo atendementu tarde liuliu kondisaun estrada no ponte ladun di’ak iha tempu udan, enkuantu iha postu-administratvu sira sempre koloka médiku rua ba leten hodi halo rotasaun, kuazé pesoál saúde la’ós ema rai-na’in maibé dalaruma mós husi Fatuberliu nia ema no nasionál balun.
“Maibé, ita sei eforsu hodi garante kondisaun pasiente sira-nia moris, atu labele akontese probelema grave ruma,” nia dehan.
Jornalista : Alexandra da Costa
Editór : Cancio Ximenes
