DILI, 04 Agostu 2025 (TATOLI) – Komisaun A iha Parlamentu Nasionál ba asuntu Konstituisionál no Justisa konsidera Kódigu Sivíl Timor-Leste Tetun & Anotada 2025 sei fasilita serbisu autór judisiáriu sira.
Prezidente Komisaun A, Patrocínio dos Reis Fernandes, apresia inisiativa Governu, liuhusi Ministériu Justisa ne’ebé prodús livru Kódigu Sivíl Tetun no Anotadu ne’e.
“Ba ami, ninia substánsia ne’e mak importante, katak livru Kódigu Sivíl ho tetun, ninia konteúdu iha laran ne’e bele fasilita duni ita-nia autór judisiáriu sira atu halo interpretasaun ba iha sira-nia serbisu loroloron hodi fó asisténsia justisa ba povu”, nia dehan iha Parlamentu, ohin.
Patricínio mós rekoñese preokupasaun balun husi públiku kona-ba tau fotografia Primeiru-Ministru, Kay Rala Xanana Gusmão, iha kapa livru Kódigu Sivíl no tuir nia, ne’e normál.
“Xanana figura importante hanesan líder nasionál no Komandante ein-Xefe FALINTIL ne’ebé ninia kontribuisaun ba nasaun dezde iha luta ba indepedénsia hasoru invazaun no iha tempu ukun an kontinua luta maka’as ba dezenvolvimentu país”, dehan.
Relembra katak Vise-Ministru ba Fortalesimentu Instituisionál, Paulo Samuel da S. dos Remédios, antes ne’e eslika ona razaun tau imajen Xefe Governu nia iha kapa livru Kódigu Sivíl Tetun no Anotadu, tanba hetan autorizasaun husi Xanana.
Produsaun livru ne’e, Ministériu Justisa, liuhusi Vise-Ministru ba Fortalesimentu Instituisionál no Tribunál Rekursu halo hodi hafásil públiku atu hatene kona-ba saida mak Kódigu Sivíl iha lia-tetun.
Aleinde ne’e, fahe ba autór judisiáriu no kargu xefia sira iha Ministériu Justisa hodi bele entende.
Notísiarelevante: Governu klarifika imajen ba kapa livru Kódigu Sivíl tetun anotada
Jornalista: Nelson de Sousa
Editora: Maria Auxiliadora
