DILI, 01 Agostu 2025 (TATOLI)-Vise-Ministru ba Fortalesimentu Institusionál, Paulo Manuel da S. dos Remédios, klarifika razaun tau imajen Primeiru Ministru, Xanana Gusmão, iha kapa livru Kódigu Sivíl tetun no anotada 2025, tanba hetan autorizaun husi Xefe Governu antes publika.
Produsaun livru ne’e, nia dehan kolaborasaun entre Vise Ministru Fortalesimentu Instituisionál ho Tribunál Rekursu ba Kódigu Sivíl anotada para hafasil públiku hatene konaba saida mak Kódigu Sivíl iha lian-tetun.
“Momentu ne’e ita kolabora ho UNDP atu halo tradusaun ba Kódigu Sivíl ho lian-tetun ho nia anotasaun sira no ita halo produsaun para fahe ba autór judisiáriu sira para Diretór Ministériu Justisa sira bele entende Kódigu Sivíl”, Paulo remedies ba TATOLI iha nia kna’ar fatin Kolmera, sesta-ne’e.
Nia afirma, kapa livru ho imajen Primeiru-Ministru, atu valoriza Xanana Gusmão nu’udar líder nasionál no istoriku ba Timor-Leste.
Razaun seluk, nia haktuir Kódigu Sivíl ne’e halo iha 2011 momentu ne’ebá Xanana Gusmão nu’udar Primeiru Ministru no inisiadór ba Kódigu Sivíl, ne’ebé hetan aprovasaun husi Parlamentu Nasionál no promulgasaun husi Prezidente Repúblika, José Ramos-Horta.
Paulo hateten artigu 76 iha Kódigu Sivíl ne’e fó biban ba ema sé de’it mak hakarak uza figura koñesidu ida nia fotográfia ba livru ka nia naran ba fatin ida, la presiza husu autorizasaun ba nia tanba nia ne’e ema koñesidu ona.
“Maibé ba kazu ida-ne’e, ha’u husu autorizasaun ba Primeiru Ministru, Xanana Gusmão, molok utiliza nia foto ba kappa livru kódigu sivíl anotada ne’ebé ho tradusaun lian-tetun. Ne’ebé ha’u hanoin ida-ne’e lá’os problema, tanba ha’u husu autorizaun ba ha’u nia Xefe Governu antes ha’u halo ida ne’e”, nia afirma tan.
Nia husu ba públiku atu labele krítika arbiru tanba imajen ba kapa livru ne’e hetan autorizasaun.
Iha sorin seluk, Prezidente Tribunál Rekursu, Afonso Carmona, konsidera imajen ba kapa livru ne’e normal, sé mak krítika ne’e liberdade espresaun.
“Maibe ha’u labele ko’alia hodi haklean ida-ne’e, orsida ema krítika fali ha’u. Maibé Timor ne’e presiza ema ko’alia nune’e, maibé tenke analiza la’ós krítika de’it “, nia dehan.
Notísia relevante: Komisaun A prioriza alterasaun Kódigu Sivíl atu rekoñese kazamentu iha relijiaun seluk
Jornalista : Natalino Costa
Editora : Rita Almeida
