DILI, 04 Agostu 2025 (TATOLI) – Ministériu Komérsiu no Indústria (MKI) no Kámara Komérsiu no Indústria Timor-Leste (CCI-TL, sigla portugés) asina memorandu ida kona-ba Espozisaun Internasionál Komérsiu Dili ka Dili International Trade Expo, ne’ebé sei realiza entre 28 Agostu no 01 Setembru 2025.
Ministru Komérsiu no Indústria, Filipus Nino Pereira, hateten asinatura akordu ne’e importante, tanba eventu ida-ne’e setór privadu sira mak sai autór prinsipál ba prosesu dezenvolvimentu ekonómiku nasionál.
Ministru hateten eventu ida-ne’e hothotu nian, entaun husi memorandu ida-ne’e oinsá halo parseria ne’ebé estratéjiku hodi artikula hothotu ninia nesesidade, nune’e dezenvolvimentu ekonomia ne’e iha balansu.
“Governu halo papél ida-ne’e hanesan fasilitadór. Reguladór nia implementadór mak ita-nia setór privadu sira. Ita hotu hakarak aproveita eventu ida-ne’e partilla forsa ekonómiku no potensialidade ne’ebé nasaun ida-ne’e iha, nune’e ita hotu bele aproveita hodi kontinua aposta ba dezenvolvimentu ekonómiku ne’ebé inkluzivu, reziliente no sustentavel”, Nino Pereira hateten iha Bebora, ohin.
Nia hein katak husi feira ne’e rasik bele rezulta asaun konkreta sira ne’ebé presiza iha konetividade entre setór privadu sira tantu iha rai-laran komu rai-li’ur.
“Espera iha eventu ne’e ita sei hetan esperiénsia barak no kooperasaun balun bele mosu durante iha feira ne’e. Hanoin ida-ne’e di’ak liután atu fortifika ita-nia dezenvolvimentu ekonómiku ne’ebé ita hotu hakarak sei fó benefísiu direta ba setór privadu sira”, dehan.
Iha fatin hanesan, Prezidente CCI-TL, Jorge Serrano, apresia tebes ba Governu ne’ebé sei realiza expo internasionál, tanba Timor-Leste nu’udar país foun no presiza tebes realiza feira sira hanesan ne’e hodi promove produtu sira, nomós bele dezenvolve situasaun ka ambiente hanesan turizmu, ekonomia, no kultura ba mundu.
“CCI-TL hanesan parseiru estratéjiku Governu nian, ne’ebé reprezenta setór privadu. Ami komprometidu atu apoiu kualkér atividade ligadu ba atividade ekonomia ne’ebé Governu realiza”, Jorge Serrano hateten.
Nia hatutan ho expo ida-ne’e CCI-TL sei halo esforsu másimu bazeia ba memorandu ne’e iha serbisu hamutuk ho Governu hakarak hatudu susesu iha atividade ne’e.
Iha fatin hanesan, Vise-Prezidente ba Promosaun no Kooperasaun CCI-TL, Ergui Lina Fernandes Alves, hateten asinatura memorandu ne’e halo atu CCI-TL haree hahú husi programa, identifika emprezáriu nasionál hira no produtu saida saida mak sei aprezenta.
“Parte CCI-TL oinsá garante setór privadu bele partisipa iha eventu ne’e ho másimu, no parte Governu nian atu asegura katak iha implementasaun programa ida-ne’e ita iha kompromisu hodi empodera emprezáriu lokál, katak oportunidade serbisu saida de’it atu fornese ba eventu ne’e sei mai husi empreza lokál sira nomós finansiamentu mai husi Governu”, konklui.
Notísia relevante : https://tatoli.tl/2025/07/31/governu-prevee-rihun-300-resin-ba-dili-internasional-trade-expo-2025/
Jornalista: Arminda Fonseca
Editora: Maria Auxiliadora
