KOVALIMA, 05 Agostu 2025 (TATOLI)- Autoridade Protesaun sivíl (APC), liuhusi Diresaun Nasionál Emerjénsia Resposta (DNER), Ministériu Interiór (MI) sosializa sistem operation prosedur (SOP) sentru evakuasaun emerjénsia ba komunidade sira, iha suku Suai Loro, Posto administrativu Suai, Munisípiu Kovalima.
“Atividade sosializasaun kona-ba SOP sentru evekuasaun ita hala’o iha Kovalima tanba Kovalima sai hanesan munisípiu ne’ebé trajetu iha suku ualu tanba kada tinan sempre akontese dezastre naturál ho tipu inundasaun. , maibé daudaun ne’e sei hala’o iha suku haat hodi partilla koñesementu no informasaun liga ba prosedura sira utiliza sentru evakuasaun iha situasaun emerjénsia” Diretór Diresaun Nasional Emerjénsia Resposta MI, Jaime Gonçalves dos Santos, dehan ba jornalista sira iha Suai Loro ohin.
Biban ne’e, Dirijente ne’e afirma Sentru evakuasaun atu fasilita hodi evakua vítima dezastre naturál, nune’e presiza koordenasaun liña ministeriál sira-nia apoiu servisu kona-ba emerjénsia perante utiliza sentru evakuasaun ne’ebé estabelese ona.
“SOP hanesan matadalan hodi utiliza sentru evakuasaun iha situasaun emerjénsia bazeia regra ne’ebé ita iha. Ita partilla nune’e jestór ne’ebé jere sentru evakuasaun atu komprende papél liña ministeriál sira”, nia dehan.
Atividade sosializasaun ne’e hala’o ona iha Suku Debos no Suku Suai Loro ne’ebé pertense ba postu administrativu Suai Munisípiu Kovalima ni’an no tuir planu mós sei hala’o iha suku haat sira seluk.
Iha fatin hanesan, Xefe Suku Suai Loro, Manuel Gomes da Costa, reforsa katak Autoridade Protesaun Sivíl presiza duni sosializa informasaun ba komunidade sira iha atu bele kuidadu no salva aan tanba kada tinan sempre akontese dezastre naturál.
Notisia relevante:APC distribui foos saka 500 ba autoridade Kovalima hodi apoia komunidade vulneravel
Jornalista :Celestina Teles
Editór:Florencio Miranda Ximenes
