OEKUSI, 04 Agostu 2025 (TATOLI) – Komandu Polísia Nasionál Timor-Leste (PNTL) liuhusi Departamentu Tránzitu no Seguransa Rodaviária (DTSR), rekomenda ba Autoridade Rejiaun Administrativa Espesiál Oekusi Ambeno (RAEOA) liuliu Departamentu Rejionál Transporte Terrestre(DRTT) atu uniformiza karta kondusaun ba motorista sira atu modelu ida de’it hanesan iha territóriu nasionál.
Notísia relevante:Motorista Oé-Cusse preokupa karta kondusaun provizória no la vale iha Díli
Xefe Departamentu Tránzitu no Seguransa Rodaviária Nasionál, Superintendente Asistente Polísia, Luís da Costa, hato’o rekomendasaun ne’e, iha formasaun kona-ba papél tránzitu no étika komunikasaun iha komandu PNTL Oekusi.
“Nasaun RDTL ne’e ida de’it, entaun dokumentu hahú husi pasaporte, kartaun eleitorál, billete identidade inklui karta kondusaun nia modelu ne’e tenke ida de’it, Oekusi nian diferente. Entaun, bele uniformiza karta kondusaun ne’e, atu ema hotu bele hatene, sela’e ita ba rai-viziñu, ita hatudu kartaun ne’e lahanesan – nasaun ida maibé karta kondusaun ne’e oin rua, entaun tenke uniformiza atu sai ida de’it, tenke tuir dekretu-lei ne’ebé ministériu relevánsia hasai, labele RAEOA nian modelu ketak fali ho rai-bo’ot,” nia hateten.
Notísia relevante:DNTT sensibiliza sinál tránzitu iha Oé-Cusse, atu hametin disiplina no prevene asidente
Nia lembra katak, iha tinan-2024, Diresaun Nasionál Transporte Terrestre hamutuk ho Departamentu Tránzitu no Seguransa Rodoviária nasionál informa ona ba Autoridade RAEOA liuhusi diseminasaun kona-na sinál tranzitu nian atu hametin disiplina no prevene asidente.
“Momentu ne’ebá, motorista barak hato’o sira-nia preokupasaun kona-ba problema karta kondusaun, bainhira to’o Dili hetan prende tanba modelu lahanesan iha surat tahan de’it. Ha’u espera katak, bele iha solusaun ona, tanba serbisu tékniku iha parte RAEOA nia haree asuntu sira-ne’e, polísia tránzitu hala’o de’it nia funsaun, hamriik iha luron hodi hala’o serbisu atu pasa-revista ba dokumentu transporte sira, ne’ebé karta kondusaun ne’e, munisipíu 13 modelu ida de’it, tan mak RAEOA nian tenki uniformiza, labele modelu ketak,” nia rekomenda.
Notísia relevante:DRTT Oé-Cusse prepara blanku no mákina prodús karta kondusaun orijinál iha 2024
Antes ne’e, mós motorista sira, tantu motorizada no karreta hato’o ona preokupasaun kona-ba karta kondusaun ba iha Autoridade RAEOA liuhusi Departamentu Rejionál Transporte Terrestre (DRTT) atu rezolve ona.
Nune’e Diretór DRTT Oekusi, Domingos de Almeida, mós rekoñese karta kondusaun ne’e uluk uza logotipu RAEOA no ZEESM maibé daudaun muda ona, no promete sei koordena ho nasionál atu rezolve kona-ba karta kondusaun provizória.
“Uluk hanesan ne’e duni ita tau marka ZEESM maibé agora ita muda ona, kona-ba provizória, sim, maibé hakarak informa katak, blanku iha ona, ita presiza fasilidade seluktan balun hanesan komputadór no seluktan, tanba durante ne’e ami uza tuan hotu, ne’ebé preokupasaun públiku sira, ami rekoñese, ita sei rezolve iha futuru,” nia dehan.
Entretantu, tuir ne’ebé Ajénsia TATOLI, I.P asesu iha DRTT Oekusi, katak dadus karta kondusaun ne’ebé trata ho provizóriu iha sistema hamutuk 1000-resin.
Jornalista: Abílio Elo Nini
Editór: Rafael Ximenes de A. Belo
