Jurista Corte-Real konsidera akordaun Tribunál Rekursu nulu
DILI, 05 Agostu 2025 (TATOLI)-Jurista, Alexandre Corte-Real, konsidera akordaun Tribunál Rekursu sobre fiskalizasaun abstrata husi bankada opozisaun sira ba artigu 2 husi lei númeru 4/2025, 28 Abríl, alterasaun daruak husi lei númeru 25/2021, 2 Dezembru lei organizasaun judisiária, nulu.
Dosente Fakudade Direitu Universidade Nasionál Timor Lorosa’e (UNTL) ne’e dehan laiha dalan ba Tribunál Rekursu atu kestiona Prezidente Repúblika, José Ramos-Horta, nia desizaun hodi nomea Prezidente Tribunál Rekursu, Afonso Carmona.
“Ha’u-nia pontudevista, plenária Tribunál Rekursu ne’ebé deside ne’e la-tuir andamentu prosesuál, tanba iha plenária ne’e iha de’it juis koletivu na’in-tolu, tuir loloos prosesu normál ba akordaun iha Tribunál Rekursu tenke juis na’in-lima, akordaun ida-ne’e ha’u konsidera nulu”, Corte-Real ba jornalista TATOLI via telephone, tersa-ne’e.
Tuir nia norma prosesuál tribunál rekursu hodi halo akordaun ba desizaun ruma ka fiskalizasaun abstrata tenke prenxe juis koletivu na’in-lima, la’ós na’in-tolu.
Razaun seluk ne’ebé jurista ne’e kestiona mak juis, Duarte Tilman, ne’ebé ho estatutu hetan suspensaun. “Ha’u hanoin juis Duarte Tilman tuir loloos nia impedidu, labele hola parte iha juis koletivu iha prosesu ne’e hodi foti desizaun, tanba antes ne’e nia hetan ona suspensaun ba kazu balun ne’ebé nia komete, prosesu disiplinár mós la’o hela”.
Nia dehan akordaun TR atu limita fali Prezidente Repúblika nia kompeténsia tuir lei inan artigu 86, alínea j) foti Prezidente Tribunál Supremu Justisa no fó pose ba Prezidente Tribunál Superiór Administrativu, Fiskál no Kontas nian.
“Tuir loloos ida-ne’e labele, tanba ne’e ha’u konsidera desizaun Tribunál Rekursu ba lei organizasaun judisiaria ne’ebé deklara inkonstituionál ne’e nulu”, afirma.
Jurista ne’e fó hanoin ona Prezidente Repúblika, José Ramos-Horta, atu hato’o rekursu hodi kontesta desizaun Tribunál Rekursu nian.
“Ha’u nia hanoin konaba kestaun ida-ne’e ha’u fó ona Prezidente Repúblika, no husu atu halo rekursu iha loron-lima nia laran hodi kontesta akordaun Tribunál Rekursu nian ne’ebé deside hodi deklara inkonstitusionál ba lei organizasaun judisiária”, nia konklui.
Notísia relevante: PTR konsidera akordaun TR la refere ba nomeasaun
Jornalista : Natalino Costa
Editora : Rita Almeida
