DILI, 01 Agostu 2025 (TATOLI)-Prezidente Tribunál Rekursu (PTR), Afonso Carmona, konsidera akordaun TR sobre fiskalizasaun abstrata husi bankada opozisaun sira ba artigu 2 husi lei númeru 4/2025, 28 Abríl, alterasaun daruak husi lei númeru 25/2021, 2 Dezembru lei organizasaun judisiária, la refere ba nomeasaun husi Prezidente Repúblika.
“Ha’u hanoin deklara konstitusionál ka inkonstitusionál ba lei ne’e la’ós nomeasaun, sé mak dehan nomeasaun entaun ba husu sira ne’ebá. Pedidu ne’e lei mak inkonstitusionál la’ós nomeasaun fali”, Carmona hatán ba jornalista sira iha nia kna’ar fatin Kaikoli, kinta semana-ne’e.
Prezidente Repúblika, José Ramos-Horta, liuhusi dekretu númeru 35/2025, loron 29 fulan-Abril nomea Afonso Carmona ba kargu Prezidente Tribunál Rekursu.
Notísia relevante: PR Horta husu PTR foun atu kontinua hametin konfiansa públika ba sistema justisa
Tuir nia desizaun ne’e laiha efeitu jurídiku ba desizaun Xefe Estadu, José Ramos-Horta, ne’ebé nomea ona nia ba Prezidente Tribunál Rekursu, tanba nomeasaun ne’e bazea ba lei inan artigu 86, alínea j) foti Prezidente Tribunál Supremu Justisa no fó pose ba Prezidente Tribunál Superiór Administrativu, Fiskál no Kontas nian.
Desizaun koletiva husi plenária Tribunál Rekursu ba inkonstitusionalidade artigu 2 husi lei númeru 4/2025, 28 Abríl, alterasaun daruak husi lei númeru 25/2021, 2 Dezembru lei organizasaun judisiáriu, fó sai iha loron 31 Jullu 2025 husi juis sira hanesan Duarte Tilman Soares (relatór), Jacinta Correia da Costa no António Hélder do Carmo.
“Juis ne’e ita labele interven para sira ne’e servisu independente, Konsellu Superiór Majistratura Judisiária ne’e servisu mak kontrola de’it, sé mak viola regra, aplika sansaun”, nia konklui.
Dokumentu akordaun ho númeru 05/CONST/2025/TR, NUC: 0042/25.TRDIL, baze ba pedidu fiskalizasaun abstrata tuir konstituisaun RDTL artigu 150, alínea e) haktuir persentajen baluk-lima ida (1/5) husi númeru deputadu sira-nian.
Deputadu sira ne’ebé hato’o pedidu mak hanesan Aniceto Longuinhos Guterres Lopes, David Dias Ximenes, Maria Angelina Lopes Sarmento, Antoninho Bianco, Joaquim dos Santos, Abilio Quintão Pinto, António Moniz Clau, Veronica Fernandes, Lidia Norberta dos Santos Martins, Helena Martins Belo, Maria Ana Belo Savio, José da Cruz, Cristina Yuri dos Santos Costa, Florentino Ximenenes da Costa, Mariquita Soares, Oscar Lima, Antoninho Doutel Sarmento, Sancia Florencia Paixão Bano, Dario Madeira, Helder Freitas, Adolfo Martins no Abel dos Santos.
Notísia relevante: Bankada opozisaun submete alterasaun Lei Organizasaun Judisiária ba TR atu halo Fiskalizasaun Abstrata
Jornalista : Natalino Costa
Editora : Rita Almeida
