VIKEKE, 05 Agostu 2025 (TATOLI)—Komandante Jerál (Komjer) Polísia Nasionál Timor-Leste (PNTL), Henrique da Costa solisita joven Vikeke-oan konkorre vaga rekrutamentu membru PNTL ba tinan 2025.
“Ha’u husu joven Vikeke-oan sira konkorre ba vaga rekrutamentu polísia nian ne’ebé agora daudaun loke ona. Atu liu ka la liu ne’e depende, maibé joven sira tenke prontu para kompete ho sira seluk,” Henrique da Costa hateten iha Suku Makadike de Cima, Postu Uatulari, Tersa ne’e.
Komandante Jerál PNTL ne’e dehan prosesu rekrutamentu kadete PNTL ba tinan 2025 ne’e sei la’o ho rigór liu tantu fíziku, saúde no koñesimentu kona-ba administrativu nian.
Notísia relevante: Rekrutamentu ba membru PNTL foun hahú aban
“Ha’u fiar katak joven sira husi postu lima iha Munisípiu Vikeke sei konkorre ba rekrutamentu polísia ida-ne’e tanba vaga ne’e loke ba joven feto no mane hamutuk 400. Ida-ne’e sai oportunidade ba joven sira hodi konkorre,” Henrique enkoraja.
Tuir nia katak instuisaun PNTL presiza joven jerasaun foun sira hodi hala’o kna’ar iha PNTL hodi serbí nasaun Timor-Leste.
“Joven sira-ne’e mak kontinuadór. Ami sira-ne’e loron ruma ami sei bá vida reforma. Tan ne’e, presiza jerasaun foun sira hodi fó enerjia foun ba iha polísia atu halo servisu polisiál nian ho profisionál no di’ak,” nia subliña.
Jornalista: Vitorino Lopez da Costa
Editór: Xisto Freitas da Piedade
