ME planeia koloka profesór ESJ-ESTV kuaze 700 iha tinan ne’e
DILI, 05 Agostu 2025 (TATOLI)–Ministra Edukasaun, Dulce de Jesus Soares informa iha fulan-Agostu ka Setembru tinan ne’e, Ministériu Edukasaun (ME) sei koloka profesór foun kuaze 700 ba Ensinu Sekundáriu Jerál (ESJ) no Ensinu Sekundáriu Tékniku Vokasionál (ESTV) iha territóriu nasionál.
“Iha tempu badak iha Agostu ka Setembru nia laran ita sei halo kolokasaun profesór sira kuaze 700 ba Ensinu Sekundária Jerál no Tékniku Vokasionál iha territóriu nasionál,” Dulce de Jesus ba jornalista sira iha Auditóriu Ministériu Finansa, Aitarak-Laran, Tersa ne’e.
Notísia relevante: ME sei anúnsia lista kandidatu admitidu ensinu sekundáriu ba públiku
Nia dehan iha 2026, ME hamutuk ho Komisaun Funsaun Públika implementa Lei Reforma Obrigatória ba funsionáriu sira, tanba ne’e rekrutamentu ba profesór foun ne’e sei la’o nafatin atu prenxe vaga sira-ne’ebé sei mamuk iha momentu ne’ebá.
Dulce informa katak totál profesór ne’ebé pasa iha teste hamutuk 1.095 hosi totál ema 8.779 ne’ebé konkorre ba vaga ensinu sekundáriu ne’e.
“Ida-ne’e seidauk to’o alvu ne’ebé Ministériu Edukasaun presiza tanba totál vaga ne’ebé ita iha-ne’e hamutuk 1.450. Ita sei falta 355,” nia dehan.
Governante ne’e esplika katak disiplina (matéria) portugés no tema husi literatura no kultura presiza vaga 250 maibé iha de’it 114, entaun sei presiza tan ema 136. Tétun vaga 125 maibé iha de’it 21 entaun presiza 104. Inglés vaga 125, maibé pasa iha de’it 40 no sei presiza tan 85. Maláiu vaga 75, pasa de’it mak na’in-hitu no sei falta ema 68. Istória jeografia no sidadania vaga iha 150, pasa hamutuk 73 no falta ema 77.
Ekonómia no métodu kuantitativu vaga iha 100 maibé ema pasa liu alvu. Disiplina vaga iha 100 maibé pasa ne’e iha de’it 20 no sei falta 80. Fízika no kímika vaga 125, pasa 41 no falta tan 84. Biolojia no jeolojia vaga 100, pasa hamutuk 160, entaun ida-ne’e mós liu tiha alvu ministériu nian.
Teknolojia, multimídia no informátika vaga iha 125 no ema pasa 158. Edukasaun fízika no desportu vaga iha 100 maibé pasa na’in-tolu no sei falta 93. Relijiaun no morál iha vaga 100 maibé pasa 137.
“Sei falta vaga 355. Ministériu Edukasaun sei loke tan ba ida-ne’e maibé ita agora sei foka ba ensinu sekundáriu. Ne’ebé, daudaun ita prepara hela atu anúnsia ba públiku,” nia subliña.
Jornalista : Osória Marques
Editora : Julia Chatarina
