DILI, 02 Jullu 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, informa semana oin ME anúnsia lista kandidatu admitidu ensinu sekundáriu ba públiku.
“Ami halo hotu ona verifikasaun ba bolsa kandidatu ensinu sekundáriu, ne’ebé hein semana ida tan ami públika ba públiku, nune’e sira bele mai konfirma data moris sala karik bele hadi’a”, nia dehan ba TATOLI iha nia knaar fatin Vila Verde, kuarta ne’e.
Totál profesór ne’ebé pasa 1.095 hosi totál ema 8.779 ne’ebé konkore vaga ensinu sekundáriu ne’e. “Ida-ne’e seidauk to’o alvu ne’ebé Ministériu Edukasaun presiza tanba totál vaga ne’ebé ita iha ne’e hamutuk 1.450, ita sei falta 355”, nia dehan.
Dixiplina portugés no temas husi literatura no kultura presiza vaga 250 maibé iha de’it 114 entaun sei presiza tan ema 136. Tetun vaga 125 maibé iha de’it 21 entaun presiza 104. Inglés vaga 125, maibé pasa iha de’it 40 no sei presiza tan 85. Malaiu vaga 75, pasa de’it mak na’in hitu no sei falta ema 68. Istória jeografia no sidadania vaga iha 150, pasa hamutuk 73 no falta ema 77.
Ekonómia no métodu kuantitativu vaga iha 100 maibé ema pasa liu alvu. Dixiplina vaga iha 100 maibé pasa ne’e iha de’it 20 no sei falta 80. Fízika no kímika vaga 125, pasa 41 no falta tan 84. Biolojia no jeolojia vaga 100, pasa hamutuk 160, entaun ida-ne’e mós liu tiha alvu ministériu nian.
Teknolojia, multimidia no informatika vaga iha 125 no ema pasa 158. Edukasaun fízika no Desportu vaga iha 100 maibé pasa na’in tolu no sei falta 93. Relijiaun no morál iha vaga 100 maibé pasa 137.
“Sei falta vaga 355, ministériu edukasaun sei loke tan ba ida-ne’e maibé ita agora sei foka ba ensinu sekundáriu, ne’ebé daudaun ita prepara hela atu anúnsia ba públiku ne’e”, nia dehan.
Notísia relevante: ME hahú teste kandidatu profesór ba vaga sekundáriu
Jornalista : Osória Marques
Editora : Rita Almeida
