ME prioriza reforsa institusionál no nível eskolaridade iha tinan 2026
DILI, 05 Agostu 2025 (TATOLI)–Governu liuhusi Komité Revizaun Orsamentu (KRO), Tersa ne’e, hahú konvida instituisaun Estadu hodi halo analiza no revizaun ba proposta orsamentu adisionál ba Orsamentu Jerál Estadu (OJE) 2026 ne’ebé antes ne’e submete ona, bazeia ba tetu ne’ebé Ministériu Finansa (MF) distribui ona.
Nune’e, Ministériu Edukasaun (ME) ne’ebé hetan oportunidade iha loron dahuluk halo aprezentasaun kona-ba prioridade sira.
“Ohin dadeer, Ministériu Edukasaun hetan oportunidade dahuluk iha enkontru ho Komité Revizaun Orsamentu ba 2026. Ministériu Edukasaun simu ona tetu orsamentu millaun $94, ne’ebé aloka ba saláriu no vensimentu, bens no servisu no transferénsia públika,” Ministra Edukasaun, Dulce de Jesus Soares, hateten iha edifísiu MF Aitarak-laran.
Ministra dehan, MF nia desizaun seidauk bele iha alokasaun ba kapitál dezenvolvimentu no kapitál menór, nune’e hein tempu tuir mai.
Iha aprezentasaun KRO, ME prioritiza ba reforsa institusionál, nível eskolaridade hanesan edukasaun pre-eskolár, ensinu báziku, ensinu sekundáriu jerál no tékniku vokasionál inklui Ensinsu rekorrente.
Notísia relevante : ME prioriza literasia no numerasia iha tinan 2025
ME nia ezekusaun orsamentu to’o trimestre daruak ba tinan 2025 atinje ona 60% husi totál alokasaun millaun $113.
Iha sorin seluk, Ministra Finansa, Santina Cardoso, nu’udar mós membru KRO, nota katak ME tau prioridade ba nível eskolaridade no rekursu umanu.
“Programa prinsipál Ministériu Edukasaun mak ensinu pre-eskolár, ensinu báziku, inklui ensinu tékniku vokasionál. Aleinde ne’e, númeru profesór, alunu, kondisaun eskola no haree ba ezekusaun ministériu nian. Ida-ne’e Komité Revizaun Orsamentu bele haree no sai pontu diskusaun ba ohin,” Governante ne’e katak.
Ministra Finansa reforsa, importánsia husi KRO mak atu hatene númeru forsa traballu kada ministériu no kada programa prioridade sira. Depois aprezenta mós difikuldade no obstákulu sira.
“Hanesan Ministériu Edukasaun iha problema kompleksu oituan, entaun liuhusi KRO ita bele deside molok ba jornada orsamentu,” nia katak.
Iha loron 30 Juñu 2025, Governu liuhusi desizaun Konsellu Ministru deside tetu indikativu ba despeza ba OJE 2026 hamutuk biliaun $1,85.
Jornalista : Osória Marques
Editora : Julia Chatarina
