Ministru Honório konsidera Governu presiza fó subvensaun ba IES hodi hadi’a kualidade
DILI, 05 Agostu 2025 (TATOLI)–Ministru Ensinu Superiór, Siénsia no Kultura, José Honório da Costa Pereira Jerónimo, konsidera, Governu presiza fó subvensaun ba Institutu Ensinu Superiór (IES) hodi hadi’a kualidade edukasaun, hanesan parte ida atu integra iha Asosiasaun Nasaun Sudeste Aziátiku (ASEAN, sigla portugés).
“Ida-ne’e ita presiza ajusta ba malu atu nune’e ajusta mós ba kualidade, entaun Governu nia responsabilidade atu fó subvensaun para universidade no instituisaun sira bele mellora di’ak liután sira-nia instituisaun,” Ministru informa ba Ajénsia TATOLI, iha Ministériu Finansa, Tersa ne’e.
Notísia relevante : MESSK serbisu hamutuk Rede ASEAN hodi hasa’e kualidade edukasaun
Governante ne’e dehan, maski lian portugés konsagra ona iha Konstituisaun Repúblika Demokrátika Timor-Leste (RDTL) hanesan lian ofisiál, maibé governante ne’e nota persentajen populasaun Timor-Leste ne’ebé ko’alia lian portugés ho di’ak ki’ik tebes.
“Ida-ne’e mak Ministériu kontinua fó subvensaun públika ba Institutu Ensinu Superiór iha tinan oin,” nia akresenta.
Tuir sensu populasaun husi diresaun nasionál estatístika tinan 2015 nian, kuaze 30% husi timoroan mak bele komunika ho efetivu iha lian portugés.
Jornalista : Osória Marques
Editora : Julia Chatarina
