OEKUSI, 05 Agostu 2025 (TATOLI) – Sekretária Rejionál Edukasaun no Asuntu Sosiál, Inácia Tamele, informa, projetu ba Eskola Bázika Filiál (EBF) tolu ne’ebé antes ne’e hatuur ona fatuk dahuluk, kompañia sira sei kontinua serbisu tanba Autoridade Rejiaun Administrativa Espsiál Oekusi Ambeno (RAEOA) selebra kontratu hafoin Despaxu Primeiru-Ministru fó sai atu bandu labele halo aprovizionamentu foun.
“Tinan ne’e, ita harii eskola foun tolu, foin daudaun ita halo ona lansamentu hatuur fatuk dahuluk, ne’ebé ha’u sente deklarasaun husi Primeiru-Ministru nian sei la impede projetu tolu ne’e, tanba orsamentu aposta kedas iha Planu Asaun Anuál, no ita mós halo ona lansamentu no kontratu, ne’ebé kompañia sira hahú serbisu ona,” Inácia Tamele dehan, iha Oekusi, ohin.
Nia informa, konstrusaun eskola tolu referida nu’udar Ensinu Báziku Filiál (EBF) mak hanesan, EBF Kiupanaf lokaliza iha suku Cunha sub-rejiaun Pante Makasar, ho nia medida metru 22×9 ezekuta husi kompaña lokál Neten Unipesoál Lda ho valór kontratu $63,315.77 durasaun serbisu durante fulan neen (6).
EBF Fatubena iha suku Usitaku sub-rejiaun Nítibe, ho nia medida metru 17,50×9, konstrui husi kompaña lokál Marzitebes Unipesoál, Lda, ho valór orsamentu $65,420.88, durasaun serbisu fulan neen (6), EBF Poasbot ho nia medida metru 15×9, konstrui husi kompaña lokál Suni Oni Unip Lda ho valór orsamentu $57,816.71, durasaun serbisu fulan neen (6).
Entretantu, iha loron 31 Jullu 2025, antes ne’e, Primeiru-Ministru, Kay Rala Xanana Gusmão, impoin limite ba rekrutamentu no aprovasaun aprovizionamentu iha RAEOA liuhusi Despaxu n. 014/PM/VII/2025, ne’ebé publika iha kinta-feira ne’e, loron 31 fulan-Jullu 2025, determina restrisaun administrativa no finanseira lubun ida, ne’ebé sei aplika ba RAEOA, ho efeitu ne’e hahú husi loron tuirmai hafoin ninia publikasaun.
Desizaun ne’e halo parte iha prosesu tranzisaun husi estrutura atuál RAEOA nian ba modelu funsionál foun, ne’ebé besik liu ba rejime munisipál ne’ebé adota iha divizaun administrativa seluk iha país laran, hanesan estabelese ona iha Rezolusaun Governu n. 29/2025, loron 18 fulan-Juñu. Transformasaun ida-ne’e ninia objetivu mak hakarak promove partisipasaun boot liuhusi populasaun lokál iha jestaun administrativa no ekonómika Rejiaun ne’e nian no iha tempu hanesan, determina mandatu hosi órgaun atuál hotu-hotu iha RAEOA.
Tuir despaxu, órgaun sira husi RAEOA no husi Komité Ezekutiva Zona Ekonómika Espesiál Futura nian, bandu hodi kontrata tékniku ka asesór foun, hodi husu mobilidade funsionáriu públiku sira, nune’e mós hodi autoriza hahú prosedimentu sira aprovizionamentu nian ne’ebé la limitadu ba nesesidade ne’ebé iha ligasaun maka’as ba jestaun lorloron nian. Despeza hotu-hotu ne’ebé relasiona ho fornesimentu bens, prestasaun servisu ka ezekusaun obras públikas tenke iha paresér préviu vinkulativu husi Primeiru-Ministru, inklui prosedimentu ne’ebé adjudika tiha ona ka, ne’ebé la’o hela, ne’ebé la tuir dispozisaun sira ne’ebé oras ne’e vigora.
Despaxu ne’e mós estabelese obrigasaun hodi hetan pareser préviu hosi Xefe Governu ba kualker adjudikasaun, maski adjudikasaun ne’e desidi antes, bainhira la respeita kritériu ne’ebé defini ona. Kona-ba viajen ba estranjeiru hosi membru órgaun sira RAEOA nian, sira-ne’e agora sei limita ba másimu membru na’in-haat kada delegasaun, ezetu iha situasaun sira ne’ebé justifikada no autorizada uluk hosi Primeiru-Ministru.
Ho medida sira ne’e, Governu buka atu garante jestaun di’ak ba rekursu públiku sira durante faze tranzisaun institusionál RAEOA nian, hodi garante katak desizaun hotu-hotu orienta tuir kritériu responsabilidade, nesesidade, no interese públiku.
Notísia relevante:Ministériu Edukasaun introdus planu estabelesimentu Ensinu Pré-Eskolár iha Oekusi
Jornalista: Abílio Elo Nini
Editór: Rafael Ximenes de A. Belo
