OEKUSI, 05 Agostu 2025 (TATOLI) – Ministériu Edukasaun (ME) liuhusi Diresaun Nasionál Edukasaun Pré-Eskolár, tersa ne’e, hala’o diseminasuan hodi instrodus Diploma Ministériál númeru 64/2024 kona-ba Planu estabelesimentu rede ba Ensinu Pré-Eskolár (EPE) foun ba dirijente serbisu Edukasaun Rejiaun Administrativa Espesiál Oekusi Ambeno (RAEOA).
Xefe Departamentu Asesu Kualidade ba Edukasaun Pré-Eskolár, Leopoldu do Santos de Jesus, esplika, objetivu husi diseminasaun ne’e atu tulun serbisu edukasaun Oekusi ba futuru atu estebelese ensinu Pré-eksolár karik, presiza halo uluk levantamentu dadus ba labarik sira iha terrenu.
“Planu estabelesimentu, edukasaun pré-eskolár ida, tenke halo bazeia ba planu ida, planu rede ne’e, nia objetivu atu halo balansu estabelesimentu edukasaun pré-eskolár, tanba bazeia identifikasaun katak, área rurál sira iha Oekusi, labarik barak mak ladun asesu ba iha pré-eskolár, entaun bainhira atu loke pré-eskolár ida, tenke hatuur planu ida di’ak, la’ós harii pré-eskolár iha fatin ne’ebé de’it maibé tenke iha alvu loloos ba labarik sira, hodi asesu ho distánsia ne’ebé besik,” nia dehan.
Notísia relevante:ME fasilita formasaun EMuLi ba eskola EPE no EB 41 iha Oekusi
Iha fatin hanesan, Sekretária Rejionál Edukasaun no Asuntu Sosiál, Inácia Tamele, konsidera divulgasaun ne’e pertinente, nune’e iha futuru atu estabelese Ensinu Pré-Eskolár foun bazea de’it ba planu, tanba RAEOA daudaun ne’e foin estabelese Ensinu Pré-Eskolár 16.
“Disemniasaun ne’e, ko’alia kona-ba divulgasaun planu rede edukasaun pré-eskolár, no kuadru pesoál estabelesimentu edukasaun pré-eskolár públiku, ida-ne’e importante tebes tanba durante ne’e, ita foin iha ensinu pré-eskolár 16, entaun liuhusi sosializasaun ne’e, ita sei espanda tan ba suku sira seluk, ho objetivu katak ita tenke prepara ita-nia estudante sira, tanba ita haree kualidade edukasaun kuandu la’o di’ak, ita tenke prepara oan sira antes iha uma depois ba pré-eskolár depois mak kontinua ba ensinu báziku siklu dahuluk daruk to’o siklu datoluk,” nia orgullu.
Notísia relevante:Autoridade RAEOA harii pré-eskolár rua no EBF ida iha aldeia Sanane
Entretantu, partisipa desiminasaun ne’e, mai husi autoridade lokál, xefe suku no jestór sub-rejiaun Nítibe no Pante Makasar.
Jornalista: Abílio Elo Nini
Editór: Rafael Ximenes de A. Belo
