OEKUSI, 15 Abríl 2025 (TATOLI)– Ministériu Edukasaun (ME) hamutuk ho Sekretária Rejionál ba Edukasaun no Asuntu Sosiál (SREAS), segunda ne’e, halo abertura formasaun kona-ba Edukasaun Multilingua (EMuLi) ba manorin sira hamutuk 41 husi Ensinu Pré-eskolár (EPE) no Ensinu Báziku (EB) siklu I, II husi eskola 41 iha Rejiaun Administrativa Espesiál Oekusi Ambeno (RAEOA).
Responsavél programa EMuLi iha Ministeriu Edukasaun,Francisca Alzira de Jesus Soares, informa katak, formasaun ne’e realiza ho objetivu atu hariku tan manorin sira nia koñesimentu kona-ba implementasaun programa EMuLi liuhusi metódolojia no perspetiva linguístika, kuríkulu pré-eskolár no Ensinu Baziku.
Notísia relevante:Garante kualidade apredizajen, Edukasaun Oekusi kontinua implementa programa EMuLi
Aliende ne’e mós atu fahe informasaun kona-ba programa EMuLi inklui polítika planu progresaun EMuLi, diploma ministeriál, kuríkulu no progresu sira.
Tanba ne’e, nia agradese ba manorin sira-nia partisipasaun, espera katak depoizde formasaun sei aumenta manorin sira nia koñesimentu kona-ba metódolojia, atu oinsa bele aplika fali ba alunu sira iha eskola.
“Apresia tebes tanba ita bo’ot sira bele marka prezensa iha formasaun kona-ba prinsipíu no metódolojia EMuLi, ha’u hein katak oportunidade ne’e ita-bele aprende buat foun atu aplika iha ita-nia eskola, bazeia ba saida mak ita aprende ona,” nia ko’alia iha salaun otél Ambeno.
Iha fatin hanesan, Diretora Jerál Nasionál ba Planu Politika Inkluzaun no Informatika, Odilia Das Dores Martins, esplika, katak formasaun ida ne’e, bele hakbi’it no aumenta liutan manorin sira nia koñesimentu liuliu iha prosesu aprendizajen.
“Ita uza lian inan hanesan ponte atu oinsa alunu sira bele aprende tan lian sira seluk hanesan tetun no portuges, bainhira alunu sira seidauk hatene lian sira seluk entaun ita halo introdusaun uluk ho lian inan ka baiquneo. Imi la’o atu hanorin lian inan ba ita nia oan sira maibé uza lian inan atu halo introdusaun ba siensia hotu ne’ebé mak ita bo’ot sira hanorin nun’e e alunu sira fasil komprende lian sira seluk,” katak Diretora Jerál Planu Politika Inkluzaun no Informatika.
Iha biban ne’e, Sekretária Rejionál ba Edukasaun no Asuntu Sosiál, Inácia Tamele, fó hanoin ba manorin sira, atu aproveita formasaun ne’e hodi aprende di’akliu tan, kona-ba metódolojia, tanba la fasíl ba manorin sira-ne’ebé hanorin estudante sira iha Pré-eskolár no Ensinu Báziku primeiru no segundu siklu.
Sekretária mós apresia ho programa EMuLi tanba sempre fasilita manorin sira, atu uza metodolojia ne’ebé efisiénsia no efetivu hodi garante kualidade prosesu ensinu aprendizajén no eskola sira-ne’ebé implemeta programa EMuLIi sempre hatudu progresu di’ak ba alunu sira.
“Ha’u agradese ba Ministériu Edukasaun, tanba apoia tebes amia mi liliu ba kapasitasaun rekursu umanu, agora saida mak bele halo, ha’u fiar katak manorin sira formasau ne’e, atu haforsa liutan profesór sira, atu hanorin estudante sira ho fuan, haree estudante hotu hanesan, labele halo diskriminasaun no labele husik alunu ida iha kotuk hadomi de’it estudante balu, maibé tenke hanorin no hatudu métodu ne’ebé di’ak ba alunu hotu-hotu,” nia fó hanoin.
Formsaun ne’e sei hala’o durante loron sanulu, hahú iha loron 14 Abríl sei termina iha loron 26 Abríl 2025 ne’e.
Notísia relevante:ME husu sidadaun valoriza lian materna nu’udar identidade kultura Timor-Leste
Notísia relevante:Implementasaun programa EMuLi halo estudante ko’alia portugés ho di’ak
Jornalista: Abílio Elo Nini
Editór: Florencio Miranda Ximenes
