OEKUSI, 21 Fevereiru 2025 (TATOLI) – Ministéru Edukasaun (ME) hamutuk ho Sekretária Rejionál Edukasaun no Asuntu Sosiál, sesta ohin, komemora loron mundiál lian-inan, iha Rejiaun Administrativa Espesiál Oekusi Ambeno ho tema ‘Edukasaun multi língua ba futuru ida-ne’ebé dignu no sustentavél iha Timor-Leste’.
Iha komemorasaun ne’e, Ministra Edukasaun, Dulce de Jesus, apela ba entidade tomak liuliu inan-aman ba alunu sira, atu hadomi no konsidera lian materna nu’udar identidade kultura multi língua iha Timor-Leste.
Notísia relevante:Garante kualidade apredizajen, Edukasaun Oekusi kontinua implementa programa EMuLi
“Ha’u-nia mensajén ba Oekusi katak, keta haluha ita-nia lian, lian nafatin importante liuhusi ita-nia kultura, hanesan lian sira seluk iha rai ne’e, ita presiza valoriza, prezerva no hadomi hanesan kultura multi língua iha Timor-Leste tanba halo ita sai espesiál no nasaun úniku iha mundu”, Ministra Edukasaun hateten iha Eskola Bázika Sentrál Oekusi (EBC, sigla portugés), ohin.
Programa Edukasaun Multi Língua, liuhusi progresaun linguístika hakat ba tetun no portugés, tanba tetun ho lian materna hanesan baikeno hakerek ho alfabetu hanesan hotu iha diferénsia oituan de’it.
“Tan ne’e ha’u husu inan-aman sira, atubele fó apoia ba programa ida-ne’e, ajuda oan sira, nune’e bele tuir programa ne’e ho di’ak, tanba sei ita bo’ot sira fiar sei tuir metodolojia ne’ebé INFORDEPE ho ekipa EMuLi, hanorin sei tuir programa ne’e ho nia planu didi’ak, estudante sira sei lee, hakerek no sura kompriénde di’ak tebes, tanba evidénsia uluk ha’u mai ona vizita eskola sira hatudu dezempeñu di’ak,”Governante ne’e afirma.
Ministra ne’e esplika programa lian materna ne’e implementa tu ajuda alunu sira tanba foin tama mai eskola seidauk iha koñesimentu naton, entaun manorin sira introdús uluk ho lian materna liuliu baikeno atu komprende mak foin introdús tan ba língua ofisiál tetun no portugés.
Notísia relevante:Edukasaun kontinua kapasita manorin husi eskola 41 iha Oé-Cusse liuhusi Programa EMuLi
Iha fatin hanesan, Sekretária Rejionál ba Edukasaun no Asuntu Sosiál iha RAEOA, Inácia Tamele, dehan selebrasaun ne’e atu hametin fila-fali lian-materna liuliu Baikeno.
Daudaun ne’e, EMuLi mak sei hatudu hanoin foun iha Timor-Leste nia futuru, liuliu Oekusi tanba molok labarik sira atu tama eskola hodi aprende, primeiru tenke simu uluk lian materna liuliu baikeno.
Nune’e, nia konsidera EMuLi nu’udar programa prioridade Ministériu Edukasaun ne’ebé hahú aplika ba eskola sira iha 2012 to’o ohin loron.
“Antes ne’e iha Oekusi ekola haat de’it, maibé iha 2024 to’o agora alarga tan ba eskola 42, tan ne’e ami hato’o agradese ba Ministériu Edukasaun tanba ho programa ne’e mak bele kuda matenek ba alunu sira liuliu atu hatene lee, hakerek no sura, liuhusi introdusaun lian materna ba lian tetun no portugés,” nia dehan.
Entretantu, programa Edukasaun Multi Lingua (EMuLI), Ministériu Edukasaun implementa ona iha munisipíu tolu, ho lian diferente hanesan lian Galolen iha Munisipíu Manatutu, lian Baikeno iha RAEOA no lian-Fataluku iha munisipíu Lautein.
Notísia relevante:Implementasaun programa EMuLi halo estudante ko’alia portugés ho di’ak
Jornalista: Abílio Elo Nini
Editór: Florencio Miranda Ximenes
