OEKUSI, 06 Maiu 2026 (TATOLI) – Diretór Serbisu Rejionál Edukasaun, iha Rejiaun Administrativa Espesiál Oekusi Ambeno (RAEOA), Vincêncio Cono, informa, kandidatu Superentendente foun ba Oekusi, submete ona ba iha Ministériu Edukasaun (ME) atu hetan nomeasaun, tanba Superentendente atuál Francisco Loca, asumi fali kargu nu’udar Sekretáriu Rejionál Planeamentu no Dezenvolvimentu.
“Bainhira nia naran tama estrutura definitiva, ha’u rasik hakerek ona karta ba Ministériu Edukasaun, Diretór Jerál Planu Polítika Informatika no Inkluzaun no mós Gabinete Inspesaun Jerál, atu deside hamutuk, tanba karta ne’ebé ha’u submete ba, ho nia konteudu pedidu substituisaun ba kargu Suprentendente atu asegura serbisu inspesaun edukasaun iha Oekusi,” Diretór Cono, ba jornalista sira iha Oekusi, ohin.
Notísia relevante:Última hora: Ministru Tomas Cabral pose PA RAEOA ho estrutura na’in-24 iha Oekusi
Dirijente Edukasaun ne’e, afirma, RAEOA diferente ho munisípiu seluk, tanba Serbisu Edukasaun Munisipál (SEM) no Serbisu Inspesaun Munisipál (SIM), maibé Oekusi nian maka Serbisu Rejioná Edukasaun l (SRE) no Serbisu Inspesaun Rejionál (SIR).
Nia hateten, iha nomeasaun estrutura definitiva Autoridade RAEOA nian, Governu la sita kargu Superentendente tanba kompeténsia atu nomeia ne’e mai husi Ministeriu Edukasaun, Ministra rasik mak sei nomea.
“Ne’ebé, informasaun ha’u simu ona katak, pedidu ne’ebé ha’u submete ba Ministériu aprovadu, hamutuk ho nia inspetór eskolár sira, sei simu pose iha Ministériu Edukasaun no submete lista ne’e atu hetan homologasaun iha Komisaun Funsaun Públika, tanba sira-nia serbisu independente,” nia hateten.
Notísia relevante:Edukasaun Oekusi sei halo auditória ba ezekusaun fundu konsesaun eskolár
Entretantu, totál inspetór eskolár daudaun ne’e sei ativa hela iha Oekusi hamutuk na’in-11, hodi kobre eskola 103 komposta husi inspetór ba Ensinu Sekundária Jerál (ESG) haat, no Ensinu Sekundária Téknika Vokasionál (ETV) haat, Ensinu Báziku Sentrál (EBC) ho nia filiál sira hamutuk 80 no mós Ensinu Pré-Eskolár (EPE) 16.
Jornalista: Abílio Elo Nini
Editór: Rafael Ximenes de A. Belo
