OEKUSI, 09 Janeiru 2026 (TATOLI) – Diresaun Rejionál Edukasaun no Solidariedade Sosiál, Rejiaun Administrativa Espesial Oekusi Ambeno (RAEOA), sei halo auditória interinu ba ezekusaun fundu konsesaun eskolár ba estabelesimentu ensinu sira iha Oekusi.
Diretór Diresaun Rejionál Edukasaun no Solidariedade Sosiál, Vincêncio Cono, polítika auditória ne’e importante, nune’e bele garante ezekusaun Orsamentu Jerál Estadu (OJE) iha eskola ho di’ak no garante transparánsia.
“Tanba foin lalais orsamentu konsesaun ne’e sai tarde iha fin do ano, ne’ebé ami fó sira eskola loron lima de’it, atu hatama relatóriu mai edukasaun. Ami mós orienta katak koordena ho loja sira-ne’ebé kompra materiál, presiza fasilita resibu, nune’e labele atraza ba relatóriu tanba ne’e orsamentu Estadu, tenke gasta ho di’ak, no tenke garante transparánsia iha eskola idak-idak,” Cono informa ba jornalista sira iha Oekusi, ohin.
Notísia relevante:Eskola 90 iha Oé-Cusse simu osan konsesaun eskolár $132-resin hodi hadi’a fasilidade
Tuir nia, fundu konsesaun eskolár ne’e, Diresaun Edukasaun fó kompeténsia ba instituisaun eskolar idak-idak hodi jere rasik fundu ne’e, tanba ne’e direitu estudante nian, kada estuante hetan dollar $2, atu haree materiál didátiku, reparasaun ki’ik sira iha eskola, atividade desportiva iha eskola ou atividade arte kultura iha eskola no atividade seluk tan.
“Tanba ne’e, dirijente eskola sira tenke iha auditória, atu orsamentu ne’e gasta ho di’ak, karik iha auditória deskobre irregularidade ruma, iha sansaun mós, bele devolve fali osan, kuandu gasta osan la ho di’ak tuir relatóriu ne’ebé iha, tanba relatóriu husi kada eskola balun submete ona iha faze verifikasaun no balu seidauk submete, bainhira submete hotu, ita verifika mak foin bele tuun ba eskola sira halo auditória internu,” nia promete.
Notísia relevante:EBF Masin jere osan konsesaun eskolár hodi reabilita saladeaula
Iha sorin seluk, Xefe Departamentu Apoia Asaun Sosiál Edukasaun, Sancia da Costa Neves, reforsa-tan katak, eskola idak-idak foti ona orsamentu, no halo ona levantamentu tanba daudaun ne’e parte edukasaun halo tan levantamentu liuhusi konta bankaria, ne’ebé bainhira eskola sira halo levantamentu orsamentu mós, parte inspesaun sei la hakmatek.
“Ita sei halo auditória, sei orsamentu ita fornsese ba, sira ezekuta ho di’ak ka la’e, ida-ne’e mak ami-nia parte serbisu edukasaun hamutuk ho inspesaun sira atu haree programa hirak-ne’ebé iha, ezemplu konsisaun eskolár tenki tau matan, kompra duni materiál sira kala’e, tanba ne’e orsamentu Jerál Estadu (OJE) nian tenki ezekuta tuir programa ne’ebé planeiadu ona,” nia katak.
Notísia relevante:Edukasaun RAEOA konsege utiliza fundu konsesaun eskolár hodi hadi’a eskola sira
Jornalista: Abílio Elo Nini
Editór: Rafael Ximenes de A. Belo
