OÉ-CUSSE, 08 Novembru 2024 (TATOLI) – Eskola Bázika Filiál (EBF) 30 Agostu Masin, iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) jere osan konsesaun eskolár husi Ministériu Edukasaun hodi reabilita saladeaula hitu no fura bee-posu hodi uza ba nesesidade eskola nian.
“Ne’e inisiativa rasik husi eskola, tanba Ministériu Edukasaun fó ona osan konsesaun eskolár, entaun ha’u tenke uza halo reabilitasaun saladeaula hitu, taka parede ne’ebé ku’ak, hadi’a odamatan, janela, hariis-fatin, no hadi’a mós ahi. Ami fura bee-posu ida atu uza ba eskola”, Koordenadór EBF 30 Agostu Masin, Belarmino Beto, adianta.
Nia lembra katak, antes ne’e, sala ba ensinu-aprendizajen nia parede nakfera, odamatan no janela aat, hariis-fatin la funsiona kle’ur, tanba problema falta bee-moos, maibé liuhusi konsesaun eskolár bele solusiona.
Notísia relevante: Ekipa Ministériu Saúde observa merenda eskolár iha EBC 30 Agostu falta ijiene
“Osan ne’e sira [ME] apoia bazeia ba totál alunu iha EBF Masin hamutuk 580. Entaun, kada alunu hetan $2, ne’ebé kada períodu ami simu $3.480. Osan ne’e ha’u fahe balun ba sosa ekipamentu eskola hanesan markadór, kadernu, no sasán desportu. Bainhira ezame hotu ami hola kadernu no lapijeira hodi fahe prémiu ba estudante ne’ebé hetan valór di’ak”, dehan.
Profesór iha EBF 30 Agostu Masin, Tiago Mauno, satisfeitu ho desizaun hadi’a eskola, nune’e labele ejize beibeik ba Governu mak halo reabilitasaun.
“Durante manutensaun ne’e la inkomoda ba prosesu aprendizajen, tanba inisitiva ne’e desizaun koletiva. Ami konkorda mak hadi’a ami-nia eskola, tanba antes ne’e, ita haree kondisaun eskola ladún di’ak. Agora, ita haree rasik iha mudansa, ne’e hatudu katak labele husu beibeik ba Governu atu mai hadi’a, maibé ita mak jere rasik oinsá fó solusaun”, afirma.
Notísia relevante: EBF 30 Agostu Masin presiza lutu protesaun
Profesór sira iha EBF 30 Agostu Masin hamutuk na’in-21
Jornalista: Abílio Elo Nini
Editora: Maria Auxiliadora
