OÉ-CUSSE, 07 Novembru 2024 (TATOLI) – Ekipa husi Ministériu Saúde (MS) observa direta implementasaun Programa Merenda Eskolár iha Eskola Bázika Filiál (EBF) 30 Agostu Masin, iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) no hatudu katak merenda ba alunu sira laiha ijiene.
Xefe Departamentu Saúde Ambientál iha Ministériu Saúde, Elizário Soares Lopes, informa Ministériu Saúde no Ministériu Edukasaun fahe ekipa atu haree lala’ok merenda eskolár nian iha Oé-Cusse.
“Ami identifika ona eskola balun iha Oé-Cusse, halo monitorizasaun ba padarauu menu merenda eskolár ne’ebé implementa. Iha parte ijiene nian ita haree kondisaun barak mak ladún ijiene, ne’e realidade liuliu kondisaun dapur, armazein ne’ebé rai hahán no menu ai-han tuir padraun ne’e la ideál. Ne’e ami-nia monitorizasaun la’o tuir manuál, ne’ebé atu hadi’a”, Elizário Lopes dehan iha EBF 30 Agostu Masin, ohin.
Notísia relevante: Komisaun G husu hadi’a implementasaun programa merenda eskolár iha OJE 2025
Nia hateten orsamentu ba programa ne’e mai husi Governu hodi disonibiliza ba eskola sira ho sufisiente, tanba ne’e fornesedór sira tenke prepara ai-han ne’ebé ideál no nutritivu no tenke haree mós númeru estudante ne’ebé iha.
“Ohin ami observa menu ne’ebé la ideál, ami fó kedan oriéntasaun atu hadi’a tuir manuál menu ne’ebé Governu aprova ona, nomós ami sei rekomenda ba ministériu relevante sira atu haree, tanba ne’e importante ba alunu sira-nia saúde”, dehan.
Notísia relevante: RAEOA aloka rihun $305-resin hodi finansia merenda eskolár ba loron 40
Koordenadór EBF 30 Agostu Masin, Belarmino Beto, afirma parte eskola kolabora, nune’e bele hadi’a implementasaun Programa Merenda Eskolár.
“Ne’e hanesan meiu ida husi Ministériu Saúde atu mai halo observasaun no kontrolu ba implementasaun merenda eskolár, ne’ebé iha eskola laiha impedimentu tanba sira mai la’o tuir matadalan ne’ebé fó sai ona husi Ministériu Edukasaun, liuliu menu ai-han ne’ebé eskola fornese ba alunu sira. Entaun, tenke kolabora, se haree buat ruma ladún di’ak presiza hadi’a”, nia reforsa.
Dirijente ne’e salienta katak implementasaun merenda eskolár iha EBF 30 Agostu Masin husi segunda to’o sesta-feira alunu sira han etu ho modo tahan, ai-fuan, monu-tolun no ikan no iha sábadu mak troka ho fore-mungu tein hamutuk ho fehuk, hudi no susu-been.
Programa Merenda Eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu-aprendizajen.
Notísia relevante: Kualifika rekursu umanu sai prioridade ba Edukasaun Oé-Cusse iha 2025
Jornalista: Abílio Elo Nini
Editora: Maria Auxiliadora
