OÉ-CUSSE, 14 maiu 2024 (TATOLI) – Eskola 90 iha Rejiaun Administrativa Espesiál Oé-Cusse Ambeno (RAEOA), tersa nee, simu ona osan konsesaun eskolár períodu dahuluk husi Sekretária Rejionál ba Asuntu Edukasaun Solidariedade Sosiál, ho montante $132, 342.00 atu uza hadi’a fasilidade no apoia nesesidade eskola nian.
Notísia relevante: Rogério Lobato identifika CAFE Oé-Cusse enfrenta problema bee-moos no laiha kampu desportiva
Diretór Servisu Eduksaun Oé-Cusse, Vincencio Cono, informa, osan konsesaun eskolár ne’e oferese eskola 90 ho totál estudante 21.509.
Kada estudante hetan $2,00, mai husi Pré-eskolár 12 ho totál estudante 748, Eskola Ensinu Báziku 72 ho totál estudante 17.425, Eskola Sekundáriu Públiku lima (5) ho totál estudante 2.359 no Eskola Tékniku Vokasionál ida (1) ho totál estudante 977.
“Ohin osan ne’ebé ohin imi simu ba fulan tolu; maiu, juñu to’o jullu remata, maibé kada fulan hatama relatóriu eskrita mai edukasaun, atu prepara prosesa ba períodu tuir mai,” Vincencio Cono, apela ba dirijente eskola sira iha salaun edukasaun Oé-Cusse.
Iha biban hanesan, Sekretária Rejionál ba Asuntu Edukasaun Solidariedade Sosiál, Inácia Tamele, fó hanoin ba dirijente eskola no Konsellu dos País, utíliza osan konsesaun eskolár ne’e, bazea nesesidade eskola no ezekuta ho transparánsia.
“Ha’u husu de’it, serbisu hamutuk konsellu dos país apoia ideia ba manorin sira, atu utíliza osan ne’e ba estudante no eskola nia nesesidade, la’ós ba nesesidade seluk, ami husu ezekuta osan ne’e, tenki tuir nia padraun ho transparánsia.”
Nia apela, eskola barak iha área rurál, susar asesu kioske no loza sira balu laiha resibu (kwetansia), nune’e husu bainhira kompra materiál ruma liga ho nesesidade eskola, presiza buka loza ne’ebé iha, nune’e bainhira iha auditoria bele sai baze komprovativu ba ezekusaun.
Notísia relevante: Estudante Boboloa Oé-Cusse tuur de’it iha rai tuir ensinu no aprendizajen
Diretór Eskola Bázika Sentrál (EBC, sigla portugés) Pássabe, Antón Lafo, orgullu tanba tinan barak eskola sira iha Oé-Cusse, ladún asesu ba konsesaun eskolár ne’e.
“Maibé iha mandatu Governu ne’e hanoin di’ak, tanba ami tinan barak, osan ne’e nunka hetan, ami espera ho prezensa autoridade foun bele hadi’a di’akliu-tán erru sira-ne’ebé naksalak iha tempu sesante nian,” nia orgullu.
Notísia relevante: EBC Boboloa iha Oé-Cusse menus sala aula difikulta prosesu aprendizajen
Jornalista: Abílio Elo Nini
Editór: Evaristo Soares Martins
