Rogério Lobato identifika CAFE Oé-Cusse enfrenta problema bee-moos no laiha kampu desportiva
OÉ-CUSSE, 05 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, identifika Sentru Aprendizajen no Formasaun Eskolár (CAFE, sigla portugés) iha rejiaun ne’e enfrenta problema bee-moos no laiha kampu desportiva ba estudante sira.
Vizita ne’e akompaña ho Sekretária Rejionál ba Asuntu Edukasaun no Sosiál, Inácia Tamele, iha loron-segunda ne’e.
Notísia relevante: Rogério Lobato prioriza bee-moos nu’udar ajenda prinsipál iha RAEOA
Iha vizita ne’e, Rogério Tiágo Lobato, deteta iha problema bee-moos no laiha kampu desportiva ba estudante Sira, nune’e ezekutivu ne’e, promete sei rezolve hodi fasilita estudante no profesór sira bele asesu ho di’ak.
“Ohin sira rasik hateten, katak bee-moos laiha, tanba bee-moos ne’e importante ba mestre no labarik sira atu hemu, ba de’it sintina mós laiha, ne’ebé ida-ne’e problema ida, ita tenke buka atu rezolve lalais, tanba bee-moos ne’e ligasaun direita ho saúde, ijiéne pesoál,” Rogério Tiágo Lobato, informa iha ámbitu vizita ofisiál ne’e.
Eis Ministru Interiór ne’e, orgullu tanba estudante sira iha eskola CAFE maioria idade ki’ik maibé bele ko’ali lian portugés, nune’e nia fó hanoin ba profesór sira presiza aplika regulamentu sériu iha eskola hodi obriga estudante sira ko’alia portugés loron loron iha eskola.
“Ne’e ohin ha’u mai haree, saida maka sira presiza, ha’u haree kampu desportu ba labarik sira mós laiha, tanba ensinu ne’e tenke hamutuk ho desportu, atu estudante sira bele hala’o desportu, maibé ne’e problema ki’ik ita sei haree ida-ne’e mós,” nia promete.
Iha biban, Koordenadór eskola CAFE Oé-Cusse, Aleixo Coa, agradese tanba liuhosi vizita ofisiál ne’e bele avalia no observa difikuldade ne’ebé eskola enfrenta liuliu prosesu aprendizajen nian no ámbitu eskola.
“Ami agradese tanba Prezidente Autoridade RAEOA mai observa direita ami-nia eskola saida maka durante ne’e eskola enfrenta, no mós observa prosesu aprendizajen, tanba eskola CAFE hanesan públiku, tan ne’e oinsá ajuda estudante sira iha língua portugés.
Notísia relevante:PA RAEOA identifika funsionáriu balun kontratu ramata maibé kontinua serbisu
Entretantu, totál estudante iha eskola CAFE Oé-Cusse hamutuk 900, hahú hosi pré-eskolár to’o ensinu sekundáriu ho totál profesór hamutuk 20, permanente hamutuk 12 maioria Timor-oan ho profesór hosi Portugál na’in-ualu no hetan mós apoia hosi profesór kontratadu maibé hein desizaun Ministériu Edukasaun ba prosesu ingresu espesiál.
Jornalista: Abílio Elo Nini
Editór: Evaristo Soares Maertins
