PA RAEOA identifika funsionáriu balun kontratu ramata maibé kontinua serbisu
OÉ-CUSSE 03 fevereiru 2024 (TATOLI)—Prezidente Autoridade (PA) Rejiaun Administrativa Espesiál Oé-cusse Ambeno (RAEOA), Rogério Tiago Lobato, identifika iha funsionáriu balun kontratu ramata ona maibé kontinua serbisu.
“Ami komesa serbisu loron-rua ona, ha’u iha ona dadus balun hosi Sekretáriu Rejionál sira informa mai ha’u, saida maka hetan iha sira-nia fatin, funsionáriu kontratadu barak tebes sira-nia kontratu hotu ona iha loron 31 dezembru 2023 maibé sira sei kontinua serbisu nafatin. Tempu badak, Komisaun Funsaun Públika sei mai atu haree, oinsá bele loke fali vaga atu sira konkorre iha ne’ebá,” PA RAEOA informa liuhosi konferénsia imprensa iha Gabinete ZEESM Oé-cusse, sábadu ne’e.
Notísia relevante : Rogério Lobato prioriza bee-moos nu’udar ajenda prinsipál iha RAEOA
Rogério hateten, iha nasionál Governu nia problema daudaun maka funsionáriu kazuál sira barak maka kontratu ramata iha dezembru 2023 no loloos bainhira iha funsionáriu atu serbisu tenke asina kontratu ho Sekretária Rejionál atubele hatene nesesidade no tarefa serbisu.
“Maibé tuir informasaun ne’ebé ha’u iha, buat ida-ne’e la akontese, kontratu sira asina hosi nível a’as oitoan depois haruka ema sira-ne’e bá de’it Sekretáriu Rejionál ne’e, husu ba sira, imi halo saida iha ne’e, funsionáriu sira-ne’e dehan la hatene, dehan haruka mai iha ne’e, entaun sira tuur de’it la halo serbisu ida. Ne’ebé buat sira-ne’e laloos, ita tenke kurije, ha’u husu ba Sekretáriu Rejionál sira hotu, ba funsionáriu sira-ne’ebé kontratadu, ema ida-idak tenke aprezenta relatóriu, saida maka durante fulan ida-ne’e halo, halo duni ka lae, ka nia tuur de’it, depois kada fulan simu osan,” nia fó sai.
Maski funsionáriu sira seidauk submete relatóriu, maibé Prezidente Autoridade RAEOA kontinua hein hodi bele iha solusaun.
“Ha’u tenke identifika relatóriu sira-ne’e loos ka lae, maibé to’o agora seidauk submete hotu relatóriu, ka ha’u husu relatóriu inventa tun sa’e, tanba ne’e selu ho osan Estadu nian, funsionáriu ida kuandu bá serbisu fó nia forsa traballu, Estadu tenke selu nia, maibé loron-loron tuur de’it, la halo serbisu, Estadu atu selu nia oinsá, ida-ne’e mak ha’u tenke analiza pur kada kazu,” nia tenik.
Notísia relevante : Rogério Lobato sei serbisu maka’as ba dezenvolvimentu Oé-Cusse
Rogério Tiago Lobato dehan, bainhira aplika desizaun ruma la’ós tanba ódiu no vingánsa maibé tuir lei, tanba Estadu labele hapara funsionáriu maibé kontratu maka remata tenke halo fali prosesamentu foun depende nesesidade.
“Hanesan ha’u informa, ha’u mai iha ne’e la’ós halo vingansa polítika, maibé mai atu defende lei, sei serbisu duni simu remodelasaun justa maibé kuandu la serbisu labele, ne’ebé ha’u sei tau ha’u-nia asesór jurídiku hodi analiza situasaun sira-ne’e, ha’u sei la hola desizaun arbiru, tanba ne’e ha’u mai husu sira-nia relatóriu idak-idak,” nia tenik.
PA konsidera relatóriu ne’e importante, tanba ne’e funsionáriu atu hakerek ho tetum ka baiqueno, tenke halo.
“Maibé ami komesa nota katak situasaun ne’e iha irregularidade barak,” nia akresenta.
Jornalista : Abílio Elo Nini
Editora : Julia Chatarina
