iklan

HEADLINE, MUNISÍPIU, OÉ-CUSSE (RAEOA), POLÍTIKA

Rogério Lobato prioriza bee-moos nu’udar ajenda prinsipál iha RAEOA

Rogério Lobato prioriza bee-moos nu’udar ajenda prinsipál iha RAEOA

Prezidente Autoridade RAEOA, Rogério Tiago de Fátima Lobato. Imajen Tatoli/Francisco Sony.

OÉ-CUSSE, 31 janeiru 2024 (TATOLI) – Rogério Tiago Lobato, prioriza bee-moos nu’udar ajenda prinsipál iha Rejiaun Administrativa Espesiál Oe-Cusse Ambeno (RAEOA) no Zona Ekonómia Sosiál Merkadu Timor-Leste (ZEESM-TL) ba mandatu tinan lima.

Rogério Lobato bá Oe-Cusse nu’udar servidór ho espíritu atu hadi’a no dezenvolve, la’ós buka fatin.

“Prioridade ne’ebé ami sei lori maka bee-moos. Bee-moos nu’udar prioridade númeru um, lori bee-moos ba uma hotu-hotu,” Prezidente Autoridade RAEOA, Rogério Tiago Lobato, hato’o promesa ne’e liuhosi serimónia pose iha otél Ambeno, kuarta ne’e.

Eis Ministru Interiór ne’e hateten, estrutura RAEOA foun bá la’ós ho espíritu odiu no vingansa, maibé hamutuk lori Oe-Cusse ba oin.

Prioridade seluk ne’ebé estrurura RAEOA foun sei hala’o mak liña eletrifikasaun, turizmu, estrada no kréditu.

Nia dehan, tinan lima mai sei la’o ho lais liu, ne’e prioridade estado presiza define ho klaru mak hanesan formesementu bee-moos ba populasaun hotu-hotu, sei hamenus presu eletrisidade hosi  sentavu 0,23 ba sentavu 0,10 hodi fasilita investimentu

Nune’e mós kria industrializasaun ba rejiaun, fó direitu titulo ba rai hodi fasilita asesu ba povu hodi hetan krédito hosi baku, konstrusaun ne’ebé ke lais ba estrada, regularizasaun ne’ebé ke justu ba kompensasaun ba rai no propriedade pnvadu, apoia ba setór edukasaun, saúde públika, pekuária no peska.

Setór turizmu no indústria ospitalidade sei sai hanesan alvu importantes ne’ebé rejiaun sei haktuir no implementa.

Primeiru Ministru, Kay Rala Xanana Gusmão fó pose ba estrutura RAEOA foun maka hanesan, Prezidente Autoridade RAEOA, Rogério Tiago Lobato, ho nia asesór prinsipál Agustinho Caet, no Koordenadór Komisaun ZEESM-TL, João Mendes Gonçalves, ho nia Vise-Koordenadór, Régio da Cruz Salu no Herculano de Sousa.

Nune’e mós membru Autoridade sira maka hanesan, André Lao, Sekretáriu Rejionál ba Asuntu Administrasaun, Elvira Manat, Sekretária Rejionál ba Asuntu Finansa, Luís de Jesús Neno, Sekretáriu Rejionál ba Asuntu Saúde, Inácia Tamele, Sekretária Rejionál ba Asuntu Edukasaun no Asuntus Sosiál, Filomena Sila, Sekretária Rejionál ba Asuntu Agrikultura, no Marcelino Marques Coro, hanesan Sekretáriu Rejionál ba Asuntu Terra  Propriedade no Rejistu Notariadu.

Notisia relevante: Povu Oe-Cusse espera estrutura RAEOA-ZEESM foun hakbesik dezenvolvimentu to’o baze

 Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!