OÉ-CUSSE, 31 janeiru 2024 (TATOLI) – Abitante lokál sira espera estrutura Rejiaun Administrativa Espesiál Oe-Cusse Ambeno (RAEOA) lideradu Rogério Tiago Lobato no Komisaun Zona Ekonomia Sosiál Merkadu (ZEESM) foun atu hakbesik dezenvolvimentu to’o baze.
Povu fó konfiansa másimu ba Autoridade foun ne’ebé, ohin kuarta 31 janieru 2024, simu pose hosi Primeiru Ministru Kay Rala Xanana hodi lidera Rejiaun Administrativa Espesiál Oé-Cusse Ambeno (RAEOA) no Zona Ekonómia Sosiál Merkadu Timor-Leste EESM (ZEESM) ba mandatu tinan lima, persiza kontinua infraestrututura sira hodi hakbesik dezenvolvimentu to’o baze.
“Ha’u hanesan komunidade ida apoia no kontente tebes, tanba iha ona Autoridade foun atu hala’o servisu ba dezenvolvimentu Oé-Cusse, ami espera kontinua dezenvolvimentu Oé-Cusse ba oin nafatin no ba futuru di’ak liután, ami hakarak dezenvolve tenke hekbesik liután to’o povu iha área rurál,” Gaspar Naheten hosi suku Lalisuk, bá Agência Tatoli iha Otel Ambeno, kuarta ne’e.
Marcos Meni, nu’udar xefe suku Bene-Ufe, hateten, atu nomeia Prezidente Autoridade ne’e hosi Oé-Cusse oan ka hosi Dili ka hosi munisipíu seluk, laiha problema importante nu’udar sidadaun Timor-Leste.
“Maibé konfiansa ne’ebé ami fó ba Autoridade foun ne’e mak, obra barak mak Autoridade sesante husik hela, balu seidauk atinje to’o 100%, hanesan gabiaun, eskola sira, estrada rurál sira inklui bee-moos balu, entaun ami fó fiar ba Autoridade atu atu kontinua obra sira-ne’e, tanba ne’e korresponde direita ba komunidade,” nia espera.
“Ne’ebé agradese no orgullu, tanba uluk ita hamutuk ho Autoridade sesante lidera hosi maun Arsénio Bano, mós Oé-Cusse oan, halo ona servisu balu iha Oé-Cusse, ita espera ho prezensa Autoridade foun ne’e, bele hala’o servisu ho di’ak, ita nu’udar komunidade ita prontu atu koopera hodi servisu hamutuk atu dezenvolve Oé-Cusse,” nia orgullu.
Xefe suku Usitaqueno, Francisco Elo, espera ho Autoridade foun simu ona pose no dezenvolvimentu bele la’o lalais liután.
“Tanba ami nu’udar komunidade ami sei triste tebes ba estrada ne’ebé liga ba sub-rejiaun sira, liuliu área rurál sira-ne’ebé dook hosi vila,” nia espera.
Notísia relevante: Aban, Primeiru Ministru fó pose estrutura RAEOA-ZEESM
Jornalista: Abílio Elo Nini
Editor: Evaristo Soares Martins
