OÉ-CUSSE, 17 fevereiru 2024 (TATOLI) – Ministra Edukasaun, Dulce de Jesus, triste tanba tinan barak ona, estudante sira Eskola Bázika Sentrál (EBC, sigla portugés) Boboloa iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) tuur de’it iha rai hodi tuir prosesu ensinu no aprendizajen iha eskola.
Notísia relevante: EBC Boboloa iha Oé-Cusse menus sala aula difikulta prosesu aprendizajen
“Iha problema infraestrutura iha ensinu Boboloa, ne’e ita haree sai problema boot, tanba estudante sira tuur iha rai de’it, iha estudante 600-resin maibé karteira ba estudante ne’e iha 200-resin de’it, triste loos ohin ita tama ba, ita haree katak, iha estudante barak sei tur iha rai,” Ministra Edukasaun, Dulce de Jesus, ko’alia iha EBF 28 Agostu no EBC Boboloa iha sub-rejiaun Pante Makasar, sesta ne’e.
“Ha’u mós sei informa ba Prezidente Autoridade RAEOA, atu haree sekarik edukasaun Oé-Cusse iha kadeira ruma maka seidauk fahe, imediatamente bele oferese iha eskola ne’e, tanba estudante sira ho entusiazmu ne’ebé aas, maibé infelismente sira tur iha rai de’it,” nia katak .
Nia hateten, durante hala’o vizita, haree iha matéria didátiku no livru barak tebes maibé butuk de’it iha rai, tanba ne’e la’ós direitora nia sala, la’ós adjuntu nia sala maibé tanba fasilidade mak laiha duni.
Sekretária Rejionál ba Asuntu Edukasaun, Inácia Tamele, dehan kondisaun ne’ebé EBC Boboloa enfrenta ne’e dezde uluk, tanba ne’e sei esforsa atu fó solusaun.
“Ohin ha’u mai akompaña Ministra Edukasaun, ida-ne’e ha’u fiar katak, sei tau iha ha’u-nia kabaas, ha’u labele promete maibé ami sei esforsa-aan atubele responde nesesidade estudante ho manorin sira-nia preokupasaun,” nia katak.
Notísia relevante: EBC Boboloa husu autoridade komunitáriu apoia kanaliza bee-moos ba eskola
Entretantu totál estudante iha EBC Boboloa hamutuk 610, komposta hosi pré-eskolár to’o terseiru siklu, iha profesór hamutuk iha primeiru segundu siklu hamutuk na’in-sia (9) , terseiru siklu hamutuk na’in-18.
Jornalista: Abílio Elo Nini
Editór: Evaristo Soares Martins
