OÉ-CUSSE, 02 Dezembru 2024 (TATOLI) — Ministériu Edukasaun hamutuk ho parseiru sira Apoia Lideransa Mentoria Aprendizajen (ALMA), Intitutu Nasionál Formasaun Dosente no Profisionál Edukasaun (INFORDEPE) no Care-Hatutan, disponibiliza formasaun, durante loron lima, ba profesór Ensinu Báziku (EB) primeiru siklu husi eskola 41 iha Rejiaun Administrativa Espesiál Oé-Cusse Ambeno (RAEOA) kona-ba Programa Edukasaun Multi Língua (EMuLi).
Diretór Edukasaun Oé-Cusse, Vincêncio Cono, hateten formasaun ne’e realiza ba datoluk ne’ebé hala’o iha 2024 hodi foka liu ba simulasaun oinsá uza metodolojia hodi introdús siénsia, liuliu literasia no numerasia iha eskola.
Tuir nia, alvu husi formasaun ne’e mak ba profesór sira klase 1 no 2 husi primeiru siklu Ensinu Báziku no koordenadór eskola sira atu hasa’e koñesimentu nune’e garante prosesu aprendizajen iha eskola idaidak.
“EMuLi ne’e fó prioridade liu ba estudante no manorin sira atu introdús, lian materna hanesan baikenu ba estudante sira atu hatene segunda língua mak tetun no portugés iha prosesu aprendizajen”, Vincêncio Cono,l dehan iha salaun Alfándega Palaban, Oé-Cusse, ohin.
Tanba ne’e, nia salienta manorin sira la’ós atu tuir de’it formasaun, maibé aprende oinsá bele rezulta planu integradu ida depois halo simulasaun ba metodolojia oinsá atu hanorin estudante sira.
“Ohin eskola 41, uluk eskola rua de’it mak EBF 28 Agostu no EBF Boboloa, maibé daudaun ne’e aumenta tan ba eskola 39 hamutuk mak 41, maioria eskola públika, inklui privada rua mak EBF Oélulan no EBF Nefomtasa”, nia informa.
Notísia relevante: Implementasaun programa EMuLi halo estudante ko’alia portugés ho di’ak
Vicente Seko nu’udar profesór husi Eskola Bázika Filiál (EBF) Nefomtasa, sub-rejiaun Nítibe, agradese ba Ministériu Edukasaun tanba envolve sira hanesan eskola privada iha programa EMuLi.
“Oportunidade ne’ebé ami hetan iha formasaun ne’e, ami sente orgullu mezmu ami iha eskola privada, maibé agradese tanba bele hakle’an ami-nia koñesimentu, liuliu iha prosesu aprendizajen atu dezenvolve liután ami-nia prátika sira oinsá hanorin estudante sira iha primeiru no segundu siklu”, nia hato’o.
Notísia relevante: Programa EMuLi konsege influénsia eskola 66 submete proposta ba ME
Jornalista: Abílio Elo Nini
Editora: Maria Auxiliadora
