Deputadu CNRT kestiona kualidade projetu reabilitasaun estrada iha kapitál
DILI, 06 Agostu (TATOLI) – Deputadu husi Partidu Kongresu Nasionál Rekonstrusaun Timor-Leste (CNRT, iha portugés), Patrocínio dos Reis Fernandes, alerta ba Governu atu kontrola kualidade projetu reabilitasaun estrada iha Dili.
“Hakarak foti asuntu ida [ne’ebé] haree liu kona-ba problema reabilitasaun estrada iha fatin hotu-hotu, liuliu iha Dili. ADN [Ajénsia Dezenvolvimentu Nasionál] ne’e agora sei eziste ka la’e? Para halo kontrolu, tanba estrada sira ita haree halo daudaun ninia kualidade ne’e mak depois liu fulan ida no rua sobu ka ke’e filafali”, nia hato’o iha reuniaun plenária Komisaun Permanente, ohin.
Patrocínio foti ezemplu reabilitasaun estrada iha Usindu nian ne’ebé halo fulan rua de’it, agora ke’e fali ona.
Tuir nia, ida-ne’e akontese tanba laiha sistema kontrolu. “Se ida-ne’e akontese iha fatin hotu-hotu, hanesan mós estrada sira iha Dili foin tau ona alkatraun [maka] presiza kontrolu hodi haree ninia kualidade. Se la’e, liu fulan rua no tolu, ita kee filafali”, nia kestiona.
Iha parte seluk, deputadu CNRT, José Virgílio, husu Ministériu Obra Públika (MOP) atu aselera prosesu indemnizasaun ba família afetada ba alargamentu estrada iha suku Kuluhun.
“Iha suku Kuluhun, até xefe suku de’it mós fó sai iha notísia katak balun seidauk hetan pagamentu ba alargamentu estrada [maski] oferese ona sira-nia rai atu halo dezenvolvimentu ba estrada”, nia levanta.
Tanba ne’e, nia solisita ba parte Governu hodi tau matan, tanba alargamentu estrada ne’e, komunidade balun fó de’it rai metru hitu, maibé Governu husu 9 ka 12.
Notísia relevante: Komisaun E solisita ba MOP aselera indemnizasaun ba família afetada
Jornalista:Nelson de Sousa
Editora: Maria Auxiliadora
