Komandu PNTL Kovalima enkoraja joven sira kompete prosesu rekrutamentu
KOVALIMA, 06 Agostu 2025 (TATOLI)- Komandante PNTL Kovalima, Asistente Superintendente Polísia, Inancio Amaral, husu ba joven sira atu kompete hodi submete dokumentu ba prosesu halo rekrutamentu Polísia Nasionál Timor-Leste (PNTL).
“ Ha’u nia mensajen ba joven sira liuliu postu administrativu hitu prepara aan atu kompete iha prosesu rekrutamentu membru PNTL foun, mezmu ho kuotasaun ne’ebé fó sai iha Timor-Laran tomak hamutuk 400 de’it, maibé Kovalima-oan labele lakon oportunidade”, dehan Asistente Superintendente Polísia Inacio Amaral , ba jornalista iha Santa Rosa,ohin.
Komandante ne’e dehan, Joven sira bele uza oportunidade ho di’ak hodi kompete iha konkursu públiku ida-ne’e, atu nune’e bele hetan oportunidade maibé mós presiza prepara aan, prepara dokumentu ,saúde no fiziku.
Komandu PNTL Kovalima informa rekrutamentu ba kadetes foun hamutuk 400, maske seidauk, maibé komandu PNTL kumpre de’it desizaun husi Governu tanba prosesu rekrutamentu mós presiza orsamentu.
“Ho kuotasaun ne’ebé mak deside maske seidauk sufisiénte, maibé prosesu halo rekrutamentu desizaun husi Governu bazeia ba kapasidade orsamentu, nune’e ami kumpre de’it orientasaun kada munisípiu hetan hira ida-ne’e orientasaun. Komandu PNTL Kovalima simu orientasaun atu fasilita ekipa nasionál simu kandidatu submete sira-nia dokumentu “, nia dehan.
Governu hala’o rekrutamentu bazeia ba diploma ministeriál ne’ebé aprova ho dekretu-lei númeru 17/2025 hodi fó kompeténsia ba komandu Jerál PNTL loke konkursu públiku ne’ebé define ona nia kritéria sira.
Notisia relevante: PNTL Kovalima hahú distribui formuláriu rekrutamentu ba kandidatu membru PNTL foun
Jornalista :Celestina Teles
Editór:Florencio Miranda Ximenes
