PNTL Kovalima hahú distribui formuláriu rekrutamentu ba kandidatu membru PNTL foun
KOVALIMA ,05 Agostu 2025 (TATOLI)-Komandu Polísia Nasionál Timor-Leste (PNTL), Munisípiu Kovalima, tersa-ne’e, hahú distribui ona formuláriu rekrutamentu ba joven sira atu sai ajente polísia foun ne’ebé sei destakadu iha munisípiu ne’e iha futuru.
Komandante PNTL Kovalima, Superintendente Asisténte Polísia, Inácio Amaral hateten, pontu vokál munisípiu Kovalima distribui formuláriu rekrutamentu ne’e hafoin PNTL nasionál fó sai anúnsiu públiku ne’e iha loron 4 fulan-agostu 2025.
Notísia Relevante :Rekrutamentu ba membru PNTL foun hahú aban
“Ita hatene iha loron 4 agostu ne’e iha nivél nasionál loke ona oportunidade hodi halo rekrutamentu ba ajente PNTL foun ne’ebé fó sai ona anúnsiu katak hahú ohin ita distribui formuláriu ba rekrutamentu ajente PNTL foun,” Nia hateten ba jornalista iha Santa Rosa,
Nia esplika, antes distribui formuláriu rekrutamentu ne’e ba foinsa’e feto no mane iha munisípiu Kovalima, ekipa fó uluk esplikasaun kona-ba kritéria sira ne’ebé define iha diploma ministerial nú.17/2025, 25 juñu.
“ Prosesu distribui formuláriu hahú ita sukat kandidatu sira-nia altura tuir dekretu-lei ne’ebé ba feto 1,58 feto no ba mane 1,65 metru pasa hodi bele simu formuláriu ne’ebé fahe ba oin tolu mak hanesan formuláriu jerál ba aplikasaun, formulariu ba xefe suku, administradór no komandante eskuadra sira asina no formuláriu ba inan aman veteranu sira nia oan,”nia esplika.
Data distribuisaun formuláriu ne’e hahú iha loron 5 to’o 29 fulan-agostu 2025, no iha loron 12 fulan-agostu to’o loron 9 fulan-setembru aplikante sira tenke submete filafali formuláriu ne’e hodi tama ba selesaun dokumentus.
Entertantu, kritéria sira ne’ebé define iha diploma ministerial nú.17/2025 maka;
- Sidadaun Timor-Leste
- Domina pelumenus lian ofisiál ida
- Sei klosan
- Iha kualifikasaun akadémika minimu 12o ano ka ekivalente
- Sidadaun entre tinan 18 to’o 23 to’o loron 31 fulan-dezembru 2025
- Aas minimu 1,58 m ba feto no mane 1,65 m
- Iha aptidaun fiziku no mental rekoñesidu ba ezersísiu knar polísia nian
- Iha kualidade morál apropriadu no komportamentu sivíku ne’ebé permite sira atu atua ho justisa, lealdade, intergirdade, onestidade, kompoténsia professional, hodi hamosu konfiansa no respeita hosi populasaun no kontribui ba prestíjiu PNTL no instituisaun demokrátiku sira
- La hetan ezonerasaun hosi instituisaun Estadu nian seluk
- La hetan kondenasaun tanba krime internasionál sira
- Hatudu adekuasaun ba ezersísiu funsaun polísia nian, ne’ebé karakteriza ho la sai arguido iha kualkér prosesu kriminál ne’ebé la’o hela no mós la sujeita ba medida koesivu, akuzasaun formál, ka julgamentu krime internasionál ho ofensa kriminál ne’ebé hetan kastigu tinan tolu iha prijaun
- Disponivél ba knar iha ne’ebé de’it iha territóriu nasionál, bainhira tuir no kompleta iha susesu CFA-PNTL, tuir nesesidade PNTL nian.
Distribuisaun vagas 400 ne’e ba munisípiu 12 inklui Ataúro no Rejiaun Administrativa Espesiál Oekusé Ambeno (RAEOA), Ataúro vaga ba ema 10, Aileu 20, Ainaro 25, Baukau 40, Bobonaro 40, Kovalima 25, Dili 40, Ermera 37, Lautém 27, Likisa 26, Manatuto 25, Manufahi 25, RAEOA 25, no Vikeke 35.
Notísia Relevante :Rekrutamentu membru PNTL sei fahe kuota hanesan iha kada Munisípiu
Jornalista :Celestina Teles
Editór:Florenco Miranda Ximenes
