BOBONARU, 13 Marsu 2025 (TATOLI)—Ministru Interiór, Frasisco da Costa Guterres, hateten rekrutamentu membru foun Polisía Nasionál Timor-Leste (PNTL) iha tinan ne’e sei fahe kuota ka kuantidade hanesan iha kada munisípiu nune’e bele iha balansu.
Nia deklara, rekrutamentu tinan ne’e loke ba ema na’in-500 fahe ba kursu formasaun ajente 400 ho kursu formasaun Ofisiál 100 no kursu Ofisiál ne’e 50 loke ba públiku no 50 ba membru PNTL ne’ebé iha abilitasaun literária lisensiatura.
Notísia Relevante: Komandu altera kritéria ba partisipasaun feto iha rekrutamentu PNTL
“Iha 450 ne’e, ita atu rekruta oinsá. Primeiru, ita sei hamosu kuota, ita tama kada munisípiu tenke iha, nune’e labele munisípiu ida barak liu. Se la tau kuota, ha’u bele hatama Vikeke-oan tama hotu, imi hela hotu, imi hirus be hiru ba, entaun tenke tau kuota para hatene Bobonaru ne’e hira mak pasa. Kovalima nian na’in-hira, Bakcau hira, RAEOA nina hira hotu-hotu tenke tama, balansu iha Polisía Nasionál Timor-Leste,” Nia informa durante halo enkontru ho membru PNTL Munisípiu Bobonaru, kinta ne’e.
MI mos planeia iha prosesu rekrutamentu tinan ne’e vaga kursu formasaun ofisiál 100 ne’e ba akademia polisía hodi ba prepara lideransa foun PNTL nian iha future, ho razaun tanba ofisiál polisía sira atuál maioria idade ona.
“Ita boot sira agora inspetór sira-ne’e maioria idade 50 hotu ona, atu sa’e ba to’o Superintendente Xefe ne’e tinan 10-resin. Molok ita-boot sira ba, ita-boot sira reforma tiha ona. Entaun, PNTL ne’e laiha tiha Superintendente Xefr tanba ajente sira tama iha 2010 sira sa’e mai to’o leten, sira másimu sa’e mai to’o Inspetór de’it. Tuir estatutu ne’e, nia halo di’ak-liu mós to’o Inspetór xefe de’it, sei la liu ida-ne’e,” nia hateten.
Enkuantu, to’o agora Ministériu Interiór seidauk hasai despaixu Rekrutamentu ba Polísia Nasionál Timor-Leste tanba sei prepara hela kondisaun balun.
Notísia Relevante: Rekrutamentu membru PNTL foun tenke tau sees interese família
Jornalista : Sérgio da Cruz
Editór : Cancio Ximenes
