DILI, 06 Agostu 2025 (TATOLI)—Ministériu Solidariedade Sosiál no Inkluzaun (MSSI) hafoin halo ezersísiu ajustamentu ba programa sira bazeia ba Orsamentu Jerál Estadu (OJE) 2026 ne’ebé distribui husi Ministériu Finansa (MF), husu tan adisionál millaun $8 iha reuniaun Komité Revizaun Orsamentu (KRO).
“Osamentu tetu ne’e millaun $20, ami husu tan adisionál millaun $8, maibé seidauk hetan aprovasaun iha KRO,” Ministra Solidariedade Sosiál no Inkluzaun, Verónica das Dores, hateten ba jornalista sira iha Auditóriu MF, Aitarak-larak, Kuarta ne’e.
Ministra argumenta, MSSI hanesan servisu sosiál ne’ebé kobre área luan tebes entaun presiza aumenta osan.
“Ami hakarak husu adisionál. Ohin aprezenta iha Komité Revizaun Osamentu ne’e ho programa rua de’it, funsionamentu institusionál no inkluzaun sosiál,” nia akresenta.
Notísia relevante : KRO OJE 2026 foka liu ba programa Governu
Ministra nota, aprezentasun tetu osamentu ba KRO ne’e sei prosesu hela no seidauk hetan aprovasaun finál, tanba sei halo ajustamentu ho ministériu hotu, la’ós MSSI de’it.
“Hetan aprovasaun banhira Komité Revizaun Osamentu sei halo diskusaun no análiza maka foin bele hetan aprovasaun, maibé daudaun seidauk hetan aprovasaun,” nia katak.
MSSI iha tinan 2025 hetan alokasaun orsamentu hamutuk $26.188.602, ne’ebé fahe ba saláriu no vensimentu $3.982.088, bens no servisu $10.744.951, transferénsia públika $9.501.672, kapitál menór $500.000 no kapitál dezenvolvimentu $1.459.891.
Orsamentu ne’e hodi finansia programa funsionamentu no dezenvolvimentu institusionál ho sub-programa haat no atividade 29.
Jornalista : Osória Marques
Editrora : Julia Chatarina
