Vise-Ministru sei buka solusaun ba kestaun iha servisu notariadu-konservatóriu Baukau
DILI, 04 Agostu 2025 (TATOLI)-Vise-Ministru ba Fortalesimentu Instituisionál, Paulo Manuel da S. dos Remédios, hatete hamutuk ho dirijente sira sei buka solusaun ba kestaun sira ne’ebé servisu notariadu no konservatóriu munisípiu Baukau hasoru, liliu konaba mákina imprime ba dokumentu Billete Identidade.
“Ha’u fila, komunika ho DJ (Diretór Jerál) notariadu hodi konvoka enkontru ho Diretór Jerál Servisu Rejistu Notariadu para buka solusaun lalais ba ida-ne’e, karik kona-ba problema orsamentu, entaun sei tau iha orsamentu tinan-oin para hola foun mákina ne’e”, dehan nia ba jornalista TATOLI hafoin vizita Servisu Rejistu Notariadu no Konservatóriu Baukau iha segunda-ne’e.
Tuir nia, atendimentu públiku iha servisu rejistu notariadu no konservatóriu importante atu halo melloramentu, tanba produsaun billete identidade importante ba ema-nia nesesidade. Maibé, governu kontinua hasoru difikuldade oinoin ba produsaun dokumentu tanba mákina iha munisípiu neen mak la funsiona hodi atraza ba produsaun dokumentu seluk hanesan emisaun pasaporte, sertidaun moris no rejistu kriminál.
“Ita iha para fó atendimentu ba públiku ho lalais, kuandu buat balun mak avaria, entaun tenke hato’o ita foti desizaun, labele husik hodi fó impaktu ba atendimentu públiku”, nia afirma.
Durante nia vizita iha Baukau, simu lamentasaun konaba menus rekursu umanu. “Iha ne’e menus rekusu, tanba ne’e señora diretora husu ministériu apoiu ema na’in-haat”, dehan nia. Hodi hatutan fulan-ne’e bele koloka ona.
Diretora Servisu Rejistu Notariadu no Konservatóriu iha munisípiu Baukau, Agostina da Neves, husu atu bele hatán ba mákina produsaun billete identidade.
“Mákina ne’e avaria tinan-rua ba kotuk, ita esforsu atu halo melloramentu ba mákina ba produsaun BI nian, maibé nafatin la hetan solusaun”, nia afirma.
Nia dehan funsionáriu na’in-15 labele oferese atendimentu servisu iha munisípiu Baukau, liuliu ba komunidade iha postu-ualu no suku 62.
“Ami rekomenda koloka ema na’in-haat mai iha ne’e para ajuda servisu hodi oferese servisu ne’ebé di’ak ba públiku”, nia konklui.
Notísia relevante: Komputadór iha Konservatóriu Rejistu Sivíl Bobonaru limitadu
Jornalista : Natalino Costa
Editora : Rita Almeida
