Xefe Estadu husu Governu iha orsamentu 2026 tau prioridade ba labarik no inan isin-rua
DILI, 06 Agostu 2025 (TATOLI)—Prezidente Repúblika (PR), José Ramos-Horta husu ba Governu atu tau prioridade ba labarik kiik no inan isin-rua sira, iha ámbitu elaborasaun proposta Orsamentu Jerál Estadu (OJE) 2026.
“Orsamentu ne’e Governu mós tenke haree mós ba ema kiak sira, labarik sira, inan isin-rua sira, ida-ne’e prioridade boot tebes iha nasaun ida-ne’e,” Ramos-Horta hateten ba jornalista sira iha edifisiu Embaixada Portugal iha Dili, Kuarta ne’e.
Dadaun ne’e, Governu hala’o hela reuniaun Komité Revizaun Orsamentál (KRO) asiste aprezentasaun no halo analiza ba prioridade husi kada ministériu.
“Iha orsamentu 2026 nian ba Primeiru-Ministru mak deside, prioridade sira hotu hanesan kontinua obra sira ne’ebé halo hela hanesan infrastrutura, Primeiru-Ministru hateten ona ba ha’u iha 2026 nia hakarak konsentra mós ba infrastrutura sira iha fronteira, hadi’a estrada no seluk tan iha zona fronteira,” nia akresenta.
Notísia relevante : KRO OJE 2026 foka liu ba programa Governu
Antes ne’e, Konsellu Ministru deside tetu indikativu ba Orsamentu Jerál Estadu (OJE) 2026 ho valór biliaun $1,85.
Distribuisaun tetu orsamentál agregadu ba Administrasaun Sentrál iha OJE 2026 bazeia ba setór estratéjiku sira ne’ebé define husi Programa Governu no Planu Estratéjiku Dezenvolvimentu, nune’e aloka ba Setór Kuadru Institusionál 36%, ba Setór Kapitál Sosiál 28%, ba Dezenvolvimentu Infraestrutura 28%, Dezenvolvimentu Ekonómiku 7% no ba Boa Governasaun no Kombate Korrupsaun 1%.
Previzaun ba kresimentu ekonómiku 2,7% husi Produtu Internu Brutu (PIB) ba tinan 2026, iha kontestu ida konsolidasaun orsamentál nian, hafoin kresimentu ida-ne’ebé prevee ona ho valór 4,3% iha 2025. Taxa inflasaun kontinua iha trajetória ida-ne’ebé tun, prevee katak atu atinje 1,8% iha 2025, no estabiliza besik 2% iha tinan-lima oin mai.
Jornalista : Hortencio Sanchez
Editora : Julia Chatarina
