CCI-TL no East Kimberley asina akordu serbisu iha área ekonomia
DILI, 07 Agostu 2025 (TATOLI)—Kámara Komérsiu Timor-Leste (CCI-TL, sigla portugés) hamutuk ho East Kimberley asina akordu kooperasaun serbisu ida iha ámbitu Konferénsia Ekonómiku no Negósiu Timor-Leste Austrália tinan 2025.
Akordu ida-ne’e formaliza relasaun kooperativa entre entidade rua hodi rekoñese sira-nia papél ne’ebé reprezenta setór privadu Kimberley Orientál no Timor-Leste, nomós interrese ne’ebé iha hodi haburas kresimentu ekonómiku, dezenvolve forsa traballu, no parseria komersiál sira.
Prezidente East Kimberley, Amanda McLean, konsidera, akordu ne’e reflete Kámara Komérsiu nia kompromisu ba kooperasaun rejionál ho rezultadu prátiku sira.
“Ida-ne’e la’ós de’it akordu formál ida, maibé nu’udar kompromisu ba asaun nian. Ami iha ona relasaun ida ne’ebé metin no dura ho Timor-Leste liuhusi kontribuisaun ne’ebé boot halo husi traballadór timoroan sira iha ami-nia rejiaun, no parseria ida-ne’e permite ami hodi harii iha fundasaun nee nia leten. Relasaun nee ami harií ho fundasaun ba parseria komérsiu no investimentu ne’ebé sei fó benefísiu ba komunidade sira no emprezariál sira iha Timor-Leste no Kiley-Leste,” Prezidente East Kimberley, hato’o liuhusi nota ne’ebé Ajénsia TATOLI asesu, Kinta ne’e.
Notísia relevante : PR: “Konferénsia ida-ne’e sai ponte reforsa kooperasaun no dezenvolve ekonomia”
Iha biban hanesan, Prezidente CCI-TL, Jorge Manuel de Araújo Serrano, simu mós ho laran-haksolok asinatura ne’e, apresia ho inisitiva ne’ebé reprezenta pasu signifikativu ida ba kolaborasaun rejionál ne’ebé forte liu.
“Ami simu ho laran-haksolok parseria importante ho EKCCI. Hodi serbisu hamutuk, ami hakarak loke potensiál ekonómiku, harii relasaun sira ne’ebé fó benefísiu ba malu entre ami-nia komunidade sira, ne’ebé ikusmai sei apoia kreximentu no diversifikasaun ba setór privadu iha Timor-Leste,” Jorge hateten.
Akordu ida-ne’e sei vigora nafatin ho mandatu inisiál tinan-lima no nu’udar pasu dahuluk iha vizaun ida ne’ebé luan liu, ba tempu naruk-vizaun ida ne’ebé parte rua komprometidu hodi avansa liuhusi kolaborasaun kontínua, asaun prátika, ho rezultadu sira ne’ebé bele sukat.
Rejiaun East Kimberley husi Austrália Osidentál no Timor-Leste iha interrese komún hanesan hafahe de’it husi prosimidade jeográfika.
Rejiaun rua ne’e riku ho rekursu naturál sira, iha potensiálidade agríkula ne’ebé boot, kultura lokál ne’ebé vibrante tebes, no iha imterrese hanesan kona-ba avansu komérsiu rejionál hodi haburas dezenvolvimentu sustentável.
Memorandu entendimentu ida-ne’e reprezenta parseria estratéjiku bazeia ba forsa no oportunidade sira ne’ebé hanesan.
Tuir memorandu entendimentu konkorda hodi kolabora dezenvolvimentu no formasaun ba forsa traballu sira, parseria negósiu ho diresaun rua, no dezenvolvimentu ekonómiku.
Ida-ne’e inklui promove inisiativa konjunta hodi hadi’a abilidade no rezultadu empregu nian, fasilita troka komérsiu no komersiál interrejionál sira, no identifika projetu sira ba longu prazu ne’ebé apoia investimentu konjuntu, transferénsia koñesimentu, no kreximentu ekonómiku sustentável.
Memorandu Entendimentu nee estabelese mos enkuadramentu kooperasaun liuhosi atividade sira hanesan misaun téknika, programa formasaun, troka informasaun, no simeira anuál nivel altu nian. Akordu ne’e subliña importánsia husi benefísiu mútua, respeitu kulturál, no komunikasaun regulár entre Parte sira.
Jornalista : Hortencio Sanchez
Editora : Julia Chatarina
