Komjer Henrique solisita komunidade Uatulari kuidadu ho krime sibernétiku
VIKEKE, 07 Agostu 2025 (TATOLI)—Komadante Jerál (Komjer) Polísia Nasionál Timor-Leste (PNTL), Henrique da Costa solisita komunidade iha Postu Administrativu Uatulari, Munisípiu Vikeke atu kuidadu ho krime organizadu sibernétiku tanba dalabarak habosok ema hodi halo tranzasaun osan.
“Krime organizadu mak hanesan osan falsu, droga, tráfíku umanu. Ida agora sai trend iha globalmente mak krime sibernétiku ne’ebé liuhusi eletrónika ka mídia sosiál. Ita haree iha Timor-Leste seidauk sai ameasa maka’as maibé iha nasaun seluk agora daudaun maka’as liu. Ita tau osan iha banku mós ema bele foti. Ema uza telemovel mós habosok ita. Ida-ne’e iha Timor-Leste eziste ona. Tanba ne’e, ha’u husu ba komunidade atu tau-atensaun ba buat sira-ne’e, atu labele sai vítima,” Henrique da Costa ba TATOLI iha Postu Uatulari, Kinta ne’e.
Notísia relevante: Governu-PN halo hela komunikasaun aprezenta lei krime sibernétika
Líder Másimu PNTL ne’e haktuir katak bainhira asesu mídia sosiál hanesan facebook no instragram, grupu balu uza artista famozu sira-nia naran hodi habosok ema dehan manán kareta maibé tenke haruka osan ba mak foin karreta mai.
“Ema uza ema sira-ne’e nia naran hodi habosok ema seluk, hodi haruka osan. Depoiz ita haruka osan bá tiha, ema sira-ne’e la’o lakon. Iha fulan kotuk, Investigasaun Kriminál Nasionál hahú investiga kazál ida (1) ne’ebé ema habosok husi Jakarta no sira bosok tutan ema dehan fa’an karreta. Sira prodús dokumentu falsu hodi bosok tutan ita-nia timoroan sira dehan karreta ida nia folin $6.000, depoiz vítima sira simu tiha dokumentu, lori bá dealer atu foti karreta, dealer hateten ami-nia karreta ne’e ami seidauk fó-sai iha mídia katak ami-nia presu karreta tun no ami mós la prodús dokumentu hanesan ne’e,” Henrique haktuir.
Tanba ne’e, nia sujere ba komunidade sira kuandu enfrenta kazu sira hanesan ne’e, bá konsulta ho polísia sira katak ida-ne’e loos ka lae nune’e labele sai vítima.
Iha biban ne’e, joven rezisténsia Suku Vesoru, Chiquito Lopez hato’o agradesimentu ba Komandante Jerál PNTL tanba bele fó-hanoin ba komunidade kona-ba impaktu husi krime sibernétiku ne’e.
Jornalista: Vitorino Lopez da Costa
Editór: Xisto Freitas da Piedade
