DILI, 07 Agostu 2025 (TATOLI) – Madre Guilhermina Marçal solisita ba deputadu sira iha Parlamentu Nasionál (PN) atu iha seriedade ba alterasaun Lei Pensaun Vitalísia ne’e.
Nia dehan mudansa ba lei ne’e labele sai de’it hanesan matéria iha kampaña eleitorál husi polítiku-na’in sira. Tanba ne’e, nia husu ba reprezentante povu atu sente populasaun nia terus, susar no rona sira-nia halerik.
Madre Guilhermina salienta katak sosiedade preokupa tinan barak ona kona-ba pensaun vitalísia, ne’ebé la benefisia povu no tuir loloos presiza haree preokupasaun povu nian ne’ebé to’o ohin loron kontinua halerik ba edukasaun, infraestrutura, saúde no seluk tan.
Tuir nia, deputadu sira presiza iha vontade no seriedade atu tau ona iha ajenda ida loloos hodi diskute no labele kontinua sai promesa de’it. “Presiza konkretizasaun iha realidade tuir buat ne’ebé hato’o ona”, nia afirma.
Relembra katak, Xefe Bankada CNRT iha Parlamentu Nasionál, Duarte Nunes, antes ne’e promote katak depoizde resesu parlamentár sei ko’alia ho bankada sira seluk atu aprezenta inisiativa ba alterasaun Lei Pensaun Vitalísia.
Aleinde ne’e, Bankada Partidu Demokrátiku (PD) mós reafirma ona nia kompromisu atu altera lei ne’e ho objetivu mak hakarak kontribui ba dezenvolvimentu nasionál.
Iha sorin seluk, Xefe Bankada Partidu Libertasaun Populár (PLP), Maria Angelina Sarmento, dezafia bankada Governu atu aprezenta inisiativa ba alterasaun Lei Pensaun Vitalísia.
Maria Angelina hateten sesaun lejizlativa daruak Parlamentu Nasionál ramata, maibé to’o agora laiha sinál ruma husi bankada Governu atu propoin alterasaun lei ida-ne’e.
Notisia relevante: Depoizde resesu, bankada CNRT halo konsulta atu altera Lei Pensaun Vitalísia
Jornalista: Nelson de Sousa
Editora: Maria Auxiliadora
