DILI, 22 Jullu 2025 (TATOLI) – Xefe Bankada CNRT iha Parlamentu Nasionál, Duarte Nunes, informa hafoin resesu parlamentár bankada sei aprezenta inisiativa ba alterasaun Lei Pensaun Vitalísia.
Nia lamenta ho deklarasaun husi parte opozisaun ne’ebé dehan bankada apoiu Governu laiha vontade atu altera lei ne’e no sesaun lejislativa daruak ramata ona maibé seidauk iha inisiativa ruma.
Nune’e, nia promote katak hafoin tama fali, bankada sei halo konsulta ho líder bankada hotu atu haree asuntu ne’e. “Ha’u sei konsulta iha líder bankada hotu-hotu, konkorda [ona], ha’u konsulta [fali] ho partidu, ami avansa”, nia afirma iha Parlamentu, ohin.
Tuir nia, atu halakon Pensaun Vitalísia ne’e fila ba deputadu idaidak.” Ha’u-nia votu ida de’it, hapara tiha pensaun ne’e, importante hotu-hotu hakarak, ita avansa”, nia argumenta.
Notísia relevante: Bankada PD hakarak muda Lei Pensaun Vitalísia antes mandatu termina
Maski bankada Governu maioria iha parlamentár, maibé ba kestaun pensaun vitalísia ne’e presiza konsensu husi bankada sira.
“Se ami iha [kadeira 33] bele deside mesak. Más PD mós iha ema, nune’e fila mai [depoizde resesu], ita ko’alia”, nia reitera.
Lembra katak, iha 15 Jullu, Parlamentu Nasionál, resesu no sei tama fali iha 15 Setembru tinan ne’e.
Notísia relevante: PLP dezafia bankada Governu aprezenta inisiativa ba alterasaun Lei Pensaun Vitalísia
Jornalista: Nelson de Sousa
Editora: Maria Auxiliadora
