PLP dezafia bankada Governu aprezenta inisiativa ba alterasaun Lei Pensaun Vitalísia
DILI, 14 Jullu 2025 (TATOLI) – Xefe Bankada Partidu Libertasaun Populár (PLP), Maria Angelina Sarmento, dezafia bankada Governu atu aprezenta inisiativa ba alterasaun Lei Pensaun Vitalísia.
Nia hateten katak sesaun lejizlativa daruak Parlamentu Nasionál sei ramata, maibé to’o agora laiha sinál ruma husi bankada Governu atu propoin alterasaun lei ida-ne’e.
“Ita-boot sira hatene, atu halo alterasaun ba lei presiza maioria absoluta. Ami hanesan opozisaun prontu de’it kualkér tempu, bainhira bankada Governu hakarak propoin alterasaun ba Lei Pensaun Vitalísia iha Parlamentu”, Maria Angelina hateten iha Parlamentu, ohin.
Nia salienta ho kadeira haat de’it iha Parlamentu, PLP prontu atu fó apoiu. “Maibé, regra demokrátika, lei ida atu pasa presiza iha maioria. Entaun, ami labele halo buat barak, só maioria mak bele halo alterasaun”, nia deklara.
Nia lembra katak, iha lejislatura dalimak, bankada tenta integra Lei Pensaun Vitalísia ho Lei Rejime Kontributivu Seguransa Sosiál, atu elimina tiha pensaun vitalísia, maibé tentativa ida-ne’e la hetan konsensu.
Intensaun ida-ne’e halo, atu kada fulan ko’a deputadu sira-nia osan to’o idade reforma mak reklama hanesan pensaun, maibé lahetan konsensu iha 2023.
“Nune’e, labele avansa ba votasaun ba Rejime Kontributivu Seguransa Sosiál atu halakon tiha pensaun vitalísia. Agora, ami hanesan opozisaun [iha lejislatura daneen] bele propoin, maibé iha garantia katak sei la pasa, fará mais ami iha kadeira haat sei laiha oportunidade bele halo alterasaun, bankada sira seluk parese la konkorda”, nia afirma.
Xefe Bankada KHUNTO, Antonio Verdiál de Sousa, mós salienta bankada iha kadeira lima de’it iha Parlamentu, maibé prontu fó apoiu bainhira bankada boot, liuliu Governu nian aprezenta inisiativa ba atlerasaun.
Antes ne’e, Prezidente Parlamentu Nasionál, Maria Fernanda Lay, promote atu fó prioridade ba alterasaun Lei Pensaun Vitalísia iha tinan ne’e. Maski sesaun lejizlativa daruak Parlamentu Nasionál atu termina, maibé seidauk iha inisiativa ruma atu aprezenta iha plenária kona-ba alterasaun lei ne’ebé antes ne’e sai kompromisu husi bankada parlamentár sira.
Notísia relevante: Bankada PD hakarak muda Lei Pensaun Vitalísia antes mandatu termina
Jornalista: Nelson de Sousa
Editora: Maria Auxiliadora
