OEKUSI, 07 Agostu 2025 (TATOLI) – Negosiante sira iha merkadu tradisionál Numbei, husu ba Autoridade Rejiaun Administrativa Espesiál Oekusi Ambeno (RAEOA), atu prosesa lalais indemnizasaun, tanba konseidera kle’ur ona.
“Governu mai duni ami iha kedas fulan-Juñu, to’o agora seidauk mai hadi’a merkadu ne’e. Ami-nia sasán sira barak mak sei rai uma, fulan rua ona Autoridade seidauk mai apoia ami. Entaun ami husu tenke prosesa lalais indemnizasaun ne’e. Fulan rua ona seidauk prosesa tanba saida? Ami husu atu halo uma temporária,” Jestór Merkadu Numbei, Fernandu de Souza Neca, dehan iha enkontru ho ekipa konjunta iha Merkadu Numbei.
“Merkadu ne’e fulan rua ona, ami koopera hasai ona ami-nia sasán, maibé to’o agora konstrusaun merkadu foun ne’e mós ita seidauk rona nia iis bainhira mak konkursu, bainhira mak kompañia atu halo, maibé mai sobu sasán fasil tebes. Tan ne’e, ami husu aselera mós hadi’a merkadu ne’e, nune’e ami bele mai fali atu fa’an sasán,” nia dehan.
Notísia relevante:Abitante 156 iha merkadu Numbei koopera ho Governu sobu rasik uma-kioske
Iha fatin hanesan, Veronica Falo, reforsa tan, Governu presiza konstrui ona merkadu modernu, nune’e negosiante bele okupa hodi kontribui taxa ba kofre Estadu.
“Ha’u-nia preokupasaun mak ne’e, iha fulan tolu liubá, ami koopera ona ho parte Governu, hasai ona ami-nia sasán, sobu uma, lalin ami-nia kalén, ba iha fatin ne’ebé ami hela, maibé to’o agora merkadu ne’e seidauk hadi’a, agora atu muda fali ba merkadu provizória atu ami kontinua halo negósiu, atu halo barraka, entaun ami iha fulan tolu ona laiha rendimentu, oinsá ami atu lalin fali ami-nia sasán sira mai hodi harii fali barraka ka uma-oan ida atu fa’an fali. Tan ne’e, ami husu konstrui ona merkadu ne’e ho modernu, depois ami mai fa’an fali mós kada fulan ami selu ba Estadu,” nia hateten.
Hatan ba rekomendasaun sira-ne’e, Diretora Departamentu Komérsiu Indústria no Ambiente, Domingas Sufa, promete, sei informa ba Prezidente Autoridade RAEOA, antes ne’e orsamentu ba konstrusaun foun prevee ona.
“Indemnizasaun ne’e, ha’u hanoin planu Governu nian, atu kle’ur ou lais responsavel Governu sei hatan bazea dadus ne’ebé ekipa rekolla ona antes. Ne’ebé, ami sei kontinua hasa’e informasaun ne’e ba Prezidente Autoridade, ba konstrusaun foun ne’e mós diskusaun ona iha autoridade, ita tenke fó espasu ba Governu atu hanoin bainhira mak halo konstrusaun foun ne’e,” nia hateten.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Entretantu, tuir dadus ne’ebé Departamentu Komérsiu Indústria no Ambiente rejista, totál negosiánte nesesidade bázika hamutuk 110, fa’an roupa uzada (obralan) 44, fa’an modo 151, fa’an bua-malus 34, fa’an gozoliña no gazoel na’in-lima no fa’an roupa iha 46.
Jornalista: Abílio Elo Nini
Editór: Rafael Ximenes de A. Belo
