KOVALIMA, 07 agostu 2025 (TATOLI)-Diresaun Servisu Terras Propriedade no Servisu Kadasterál to’o ohin seidauk simu karta reklamasaun hosi komunidade sira kona-ba atribuisaun rai hodi harii jardím Erói ne’ebé planea sei kontrui iha aldeia Lolowa,suku Belekasak,postu administrativu Maucatar, Kovalima.
Diretór Diresaun Servisu Terras Propriedades no Servisu Kadasterál munisípiu Kovalima, Carlos Caitano, hateten, grupu balun maka halo reklamasaun kona-ba rai ne’ebé maka Governu sei uza hodi konstrui jardím ba erói iha Maukatar.
Notísia Relevante :Jardín Foho Lakirin iha Maukatar-Kovalima inaugura ona
“Liga ba grupu balun ka komunidade sira ne’ebé mak halo reklamasaun ita la taka dalan sira halo kontestasaun bele liuhosi dalan legál no mós bele submete sira-nia reklamasaun mai iha terras no propriedades komisaun terras bele mós ba tribunál hodi konsidera sira-nia direitu,” nia hateten ba TATOLI iha ninia servisu fatin Bairru Rompe, kinta ne’e.
Dirijente ne’e esplika grupu kiik ne’e halo reklamasaun tanba de’it seidauk simu pensaun veteranu maske sira fó ona kontribuisaun durante prosesu luta ba ukun-rasik aan.
“Terras no Propriedades simu pedidu husi Konsellu Kombatente Libertasaun Nasionál munisípiu Kovalima ekipa terras ita halo levantamentu iha duni komunidade aldeia dais hatudu dokumentu anteriór, iha tempu okupasaun Indonézia bainhira halo reklamasaun, maibé dokumentu foin prosesu seidauk iha desizaun final,” nia hatutan.
Nune’e husu ba komunidade ne’ebé maka oras ne’e halo reklamasaun tenke ho baze legal hodi submeter ba Diresaun Terras no Propriedade ou bele diretamente ba Tribunál.
Tuir nia rai ne’ebé maka governu planea atu harii jardím erói ne’e, durante okupasaun Indonézia hanesan kazerna Rumah Sangat Sederhana (RSS) tanba ne’e bazeia ba Lei númeru 13/2017, 5 juñu , regime espesiál Para a Definição da tularidade Dos Beins Imóveis, propriedade refere nu’udar Propriedade Privadu Estadu nian.
Hosi levantamentu dadus ne’ebé servisu tékniku sira halo iha loron 25 fulan-abríl 2025 liubá, rai ne’e ho medida 39.000 m2 hodi konstrui jardím erói iha Maukatar.
Iha sorin seluk, Prezidente Konsellu Kombatente Libertasaun Nasionál Munisípiu Kovalima, Osorio Soares Mausoko, klarifika rai ne’ebé mak atu kontrui jardím erói ne’e, Konsellu Munisípiu Kovalima hala’o ona enkontru ho sekretáriu zona sira.
“ Ami identifika rai ne’ebé proprietáriu Estadu tanba sei iha konstrusaun uma RSS ami hala’o enkontru nune’e Terra no Propreidade halo mapamentu laiha impedementu nune’e finaliza ona hala’o rituál laiha ema ruma halo reklamasaun,”nia hateten.
Tanba ne’e, nia hateten prosesu atu halo konstrusaun ba jardím erói iha postu Maukatar tama ona iha faze konkursu públiku no hein atu anúsiu ninia rezultadu ba públika nune’e empreza ne’ebé sai vensedór bele hahú implementa projetu ne’e iha 2025.
Jornalista :Celestina Teles
Editór:Florencio Miranda Ximenes
