Jardín Foho Lakirin iha Maukatar-Kovalima inaugura ona
KOVALIMA, 03 Abríl 2025 (TATOLI) – Prezidente Autoridade Munisípiu Kovalima, kinta-ne’e, inaugura rekonstrusaun jardín foho Lakirin ne’ebé lokaliza iha suku Holpilat, Postu administrativu Maukatar, Munisípiu Kovalima.
“Ohin ita haree fatin ne’e furak lós nune’e ita-nia sarani iha tempu loron boot ruma bele halo orasaun iha fatin ida-ne’e. Foho Lakirin iha Padre Maubere nia tempu hahú nune’e ita halo reabilitasaun de’it hodi bele atrai ema hotu”, Autoridade Kovalima, Miguel Armada Cardoso informa ba jornalista sira, hafoin inaugura jardín Foho Lakirin, ohin.
Autoridade Kovalima liuhusi projetu Planu Dezenvolvimentu Integradu Munisipál (PDIM) rekonstrui jardín ne’e prevee iha Orsamentu Jerál Estadu iha 2023 hamutuk rihun $140, 219 ne’ebé implementa iha 2024 no empreza konsege finaliza bazeia ba kontratu.
Miguel dehan, Empreza finaliza ona rekonstrusaun jardín Foho Lakirin ne’e tanba empreza Taroman Lakfa hahú implementa projetu iha Outubru ne’ebé tuir loloos labele hala’o ona maibé autoridade esforsu no empreza konsege finaliza iha Dezembru 2024 no ohin entrega ona.
Jardín Foho Lakirin autoridade identifika no rekoñese hanesan fatin turizmu relijiozu ne’ebé finaliza ona rekonstrusaun no autoridade fiar ba futuru komunidade sira bele uza hodi hala’o orasaun iha fatin referidu.
Autoridade Kovalima mós fó hanoin ba autoridade postu no parte igreja katak presiza atu haree hodi halo jestaun nune’e bainhira komunidade sira hala’o vizita karik atu ba reza no sunu lilin ba labele atu hasai foto de’it .
Diretora Empreza Taroman Lakfa Unipesoal Lda, Marina Gomes reforsa katak empreza hahú rekonstruisaun jardín Foho Lakirin iha Outobru no finaliza iha Dezembru 2024 no 03 Abríl hala’o ona inaugurasaun.
“Prosesu rekontrusaun jardín Foho Lakirin ne’ebé konsidera turizmu relijiozu, ami empreza konstrui gruta ho morru hale’u sori-sorin nia naruk hamutuk metro 140, luan metru neen”, nia dehan.
Fó hanoin fali katak, PDIM prevee OJE 2023 kovalima implementa projetu ualu ne’e hanesan, kompañia Savi Guju Unipesoal Lda halo konstrusaun morru hale’u edifísiu obra públika ho nia orsamentu husi PDIM $83,44.47, ho nia kustu kontratu $72,600.00.
Kompañia Mandarin Unipesoal Lda halo konstrusaun salaun enkontru postu administrativu Fohorem $132,923.43 ho kustu kontratu $116,397.52, kompañia Feto lima harii Eskola Bázika Filiál , Suku Matai, Postu Maukatar ho verba $ 87,931.39 nia kustu kontratu $76,921.36, kompañia Tofranditar Unipesoál Lda halo Konstrusuan laboratóriu Sentru Saúde Komunitáriu (SSK) Zumalai, iha suku Zulo $87,022.60 ho nia kustu kontratu ho kompañia $ 86,121.61,
Aleinde ne’e, kompañia Queenzha Falov Unipesoal Lda harii merkadu iha postu Suai verba $137,277.14, kustu kontratu $120,118.70, kompañia Bend Maha Male Unipesoal Lda harii rezidénsia ba médiku iha suku Holpilat $473,657.35 kustu konstratu $413,144.25.
Kompañia Jino Linda Unipesoal Lda konstrusaun knál irigasaun Bauraikun iha aldeia Kulu-oan Suku Tashilin, postu Zumalai ho osan $192,141.00 ho kustu kontratu $167,420.90 no kompañia Taroman Lakfa Unipesoal Lda rekonstrusaun Jardín foho Lakirin suku Holpilat postu Maukatar $155,798.80 kustu kontratu $140,219.00.
Jornalista: Celestina Teles
Editór: Rafael Ximenes de A. Belo
