ANC garante prezensa Starlink bele hasa’e reseita kontribui ba kofre Estadu
DILI, 08 Agostu 2025 (TATOLI)-Prezidente Autoridade Nasionál Komunikasaun (ANC, sigla portugés), Flávio Cardoso Neves, hateten ANC garante ho prezensa husi operadór Starlink ne’ebé bele ajuda hasa’e reseita hodi kontribui ba kofre Estadu.
“ANC espera to’o fim do anu 31 Dezembru 2025 ne’e, ANC bele kontribui reseita to’o millaun $3 ka $4. Ho operadór Starlink foun ne’e, ha’u espera reseita sei bele aumenta ba beibeik,” Prezidente ANC, Flávio Cardoso Neves, informa ba jornalista sira iha salaun auditóriu Kay Rala Xanana Gusmão iha Ministériu Finansa, Aitarak-Laran, kinta (07 Agostu 2025) ne’e.
Durante ne’e, nia informa, iha 2024 ne’e, ANC hatama reseita millaun $2.4 maibé ANC kontribui reseita millaun $3.5, nune’e iha 2025 ne’e ANC atu hetan millaun $2.2 maibé husi Janeiru mai to’o Jullu ne’e, hetan tiha ona reseita millaun $2.4, signifika liu tiha ona.
Aleinde ne’e, nia informa, iha operadór telekomunikasaun agora daudaun iha haat maibé operadór tolu mak halo operasaun hanesan Timor Telekom, Telekomsel ho Telemor, ida-ne’ebé seidauk halo ne’e mak operadór Ceslink.
“Operadór Ceslink sira esforsu hodi aplika ba espetu ne’ebé mak sira atu halo operasaun ne’e mak seidauk no ANC mós fó ona lisensamentu bá ISP sanulu resin rua,” nia esplika.
Aleinde ne’e, ANC mós fó ona sertifikasaun bá Internet Service Provider (ISP) 15 ne’e mak hanesan Starlink, Burakai, Gardamor, Metrolink no seluk tan, sira mós fó lisensa ba iha rádiu sira-ne’ebé uza espasu aero hanesan aeroportu no portu, tasi nian nomós lisensiamentu ba rádiu komunidade sira-ne’e.
“Ha’u fó lisensiamentu ISP lima mak hanesan, portu Tibar, portu aeroportu Nicolao Lobato Komoro, aeroportu Rota Sándalo Oekuse, portu Dili, aeroportu Suai,” nia dehan.
Jornalista : Alexandra da Costa
Editór : Cancio Ximenes
