EBC Mahata preokupa ho kontentór no ‘cube-house’ ne’ebé okupa arredór eskola
OEKUSI, 08 Agostu 2025 (TATOLI) – Diretór Eskola Báziku Sentrál (EBC) Mahata, Carlos de Fátima Almeida, preokupa ho kontentór no ‘cube-house’ ne’ebé okupa espasu públiku iha arredór eskola tanba difikulta atividade eskola nian.
Carlos de Fátima Almeida, informa, antes ne’e husi eskola submete ona proposta ba serbisu edukasaun Oekusi maibé seidauk iha resposta hodi muda sai ba fatin seluk.
Nia hateten, kontentór hirak-ne’e, Autoridade RAEOA destaka dezde 2015, nu’udar fatin ba bainaka espesiál sira atu hela, hodi partisipa iha komemorasaun tinan-500 ba fatin istóriku Lifau tama Timor-Leste.
“Eskola ne’e presiza fatin luan, atu kuda ai-funan no halo kampu desportivu, maibé buat sira-ne’e sei nakonu iha arredór eskola. Ami husu se bele muda tiha ba fatin seluk, tanba fatin sira-ne’e ami presiza atu luan hodi kria programa eskola nian ba estudante sira,” nia dehan ba jornalista sira iha Oekusi, kinta ne’e.
“Ami hatama ona proposta kle’ur ona ba Governu Autoridade RAEOA liuhusi serbisu edukasaun, maibé to’o agora seidauk muda kontentór no cube-house sira-ne’e,” ezekutivu ne’e afirma.
Nia lembra katak, iha fulan kotuk, Instituisaun PNTL liuhusi Polísia Unidade Fronteira (UPF) ho imigrasaun lori ekipa pezadu bo’ot ida mai tau iha arredór eskola ne’e, tanba antes ne’e iha akordu sira koopera ho Obras Públiku, konsege muda sai ona cube-house rua iha ne’e ba iha fronteira.
Autoridade eskolár ne’e haktuir tan katak, daudaun eskola orienta estudante sira kontribui tali-tahan no ai atu harii tan uma ida iha arredór eskola nian, atu utiliza ba sala aprendizajen, nune’e mós utiliza osan konseisaun eskolár nian atu harii tan sala.
“Maibé difikuldade mak ne’e, fatin laiha, tan ne’e ami rekomenda ba ba Autoridade bele koordena ho parte obra públika atu muda sai ba fatin seluk,” nia rekomenda.
Sekretária Rejionál Edukasaun no Asuntu Sosiál, Inácia Tamele, rekoñese, no parte edukasaun mós koordena ho ho instituisaun relevante sira atu transfere ba fatin seluk.
“Ida-ne’e la’ós foin, maibé tinan kotuk kedas ha’u asumi kargu ne’e, ami fó karta ona ba entidade relevante sira seluk atu muda sai kontentór sira-ne’e, ne’ebé ami sei muda tanba atu hala’o prosesu aprendizajen di’ak, estudante sira tenke iha ámbiente ne’ebé saudavél, no luan,” nia hateten.
Notísia relevante: https://tatoli.tl/2025/04/02/sem-dili-koordena-autoridade-munisipal-solusiona-okupante-aredor-eskola/
Entretantu, Ensinu Báziku Sentrál Mahata lokaliza iha aldeia Mahata suku Kutete sub-rejiaun Pante Makasar, ho totál estudante iha EBC Mahata hamutuk 300-resin ho totál profesór hamutuk na’in-11.
Jornalista: Abílio Elo Nini
Editór: Rafael Ximenes de A. Belo
