DILI, 02 Abríl 2025 (TATOLI)-Ministériu Edukasaun (ME) halo ona koordenasaun ho Diresaun Servisu Edukasaun Munisípiu (SEM) Dili hodi buka solusaun ba ema sira ne’ebé okupa aredór eskola.
“Buat ida-ne’e problema boot ida, akontese tanba rai ne’e husik mamuk no morru laiha entaun ema mai hela, ita atu hasai sira maibé sira husu ida-ne’e, ida ne’ebá. Entaun ida-ne’e la fó liberdade ba eskola sira atu halo kampu ruma hodi hala’o nia atividade ba”, dehan Ministru Edukasaun Interinu, Domingos Lopes Lemos, ba jornalista sira iha salaun Ian Martin Balide, kuarta ne’e.
Atuál Sekretariu Estadu Ensinu Sekundáriu Jerál no Ensinu Sekundáriu Tékniku Vokasionál ne’e dehan, diretór edukasaun munisipál mak sei hamutuk ho autoridade munisipál sira hodi halo koordenasaun, buka dalan ba solusaun.
Iha sorin seluk, Inspetora Jerál ME, Maria Manuela Gusmão, hateten komunidade ne’ebé okupa arredór eskola ne’e la fó liberdade ba eskola atu hala’o atividade ruma.
Tuir inspetora, estabelesimentu ensinu presiza espasu hodi harii instalasaun suporta ensinu aprendizajen.
Maria Manuela Gusmão salienta, ME fasil atu halo aprosimasaun ho komunidade ne’ebé okupa arredór eskola tanba nu’udar rai Estadu. “Maibé problema agora sé mak atu fó indemnizasaun ba sira”.
ME rejista daudaun ne’e uma-kain hamutuk 72 okupa hela arredór eskola iha munisípiu Dili, husi totál ne’e uma-kaim 52 hela iha arredór eskola ensinu báziku ho nia filiál sira, restante okupa iha eskola ensinu sekundáriu jerál no tékniku vokasionál.
Komunidade okupa eskola báziku Sérgio Vieira de Mello, 10 Dezembru, ensinu báziku filiál númeru 5 Komoro, ensinu báziku sentrál 30 Agustu, eskola ensinu sekundáriu jerál 04 Setembru UNAMET Balide, EBC Bidau Akadiru-hun, eskola sekundária tékniku vokasional indústria no teknolojia Bekora no eskola sira seluk tan.
Notísia relevante: SETP apela komunidade hamamuk areadór eskola públiku
Jornalista : Osória Marques
Editora : Rita Almeida
